immiaaqqat imigassallu
'Tuborgip ussassaarutai ingasappallaaqaat'
Tuborg ingasaassivallaaqaaq qanittukkut ussassaarilernermini immiaaqqami allagartaq ´asasaarannguara´ atoramiuk, meeqqat illersuisuat Aviâja Egede Lynge isumaqarpoq
Imigassap inuttut asanniffigisatut oqariartuutitut atornera ileqqorlunneruvoq peqqinnaranilu. Taamatut isumaqarpoq meeqqat illersuisuat Aviâja Egede Lynge, meeqqanik suliniaqatigiiffimmit MIO-meersoq.
Taassuma tusagassiorfinnut nalunaarutikkut immiaaraliorfiup Kalaallit Nunaanni ussassaarutai nutaat sakkortuumik isornartorsiorpai.
Puiaasaaqqat peqqusaartut
Meeqqat Illersuisuata pisiniarfinni immiaaqqat takoqqusaarutaat takusimavai. Immiaaqqat ilaat allagartaqarpoq ´Asasaarannguara´.
Tamanna meeqqanut kukkulluinnartumik nalunaajaaneruvoq, Aviâja Egede Lynge oqarpoq.
– Paasisinnaavara, ”Nillertunnguaq”-mik ”Mamassaaq”-mik allagartalersuineq aliikkutarineqarsinnaasoq, kisianni immiaaraq ”asasaarannguara”-mik taagussallugu meeqqanik illersuiniarnitsinni meeqqallu peqqissumik toqqissisimasumillu peroriartornissaanik qulakkeeriniarnermi akisussaaffimmut akerliuvoq.
Tuborgip allagartai mitalliinerupputq
MIO-p pisortaa isumaqarpoq Tuborgip immiaaraq inuusaartinneqartoq, inuunertullu toqqissisimasullunilu qularfiunngitsutut naleqartinneqarluni.
– Meerarpassuit ilaqutariinni imigassamik atornerluiffiusumi peroriartortut amerlavallaarujussuartut takusarpagut imigassallu persuttaannerit kinguaassiutitigullu atornerluinerit annertusaaqataaffigisarpai. Meerarpassuit asanninneq pisariaqartitartik misigineq ajorpaat, ”Asasaarannguara”-lumillu allagartalersuineq meeqqanut taakkununnga mitallerneruvoq, meeqqat illersuisuat oqarpoq.