Trumpip qinersinermi ajugaanerata kingorna IA ernumasoq

Inuit Ataqatigiit siulittaasuat, Sara Olsvig, ullaaq manna allapallappoq.

- USA-mi præsidentinngortussanngortup inuit nunarsuarmioqatigiillu avissaartuutinngitsut sulissutigissagaa neriuuteqarfigalugu annikkusuppara, neriuppunga suleqatiginnikkumassuseq, ataqqeqatigiinneq, assigiinngisitaarnermut inissaqartitsineq minnerunngitsumillu arnanik angutinillu naligiisitsineq ataqqinninnerlu tunngavigalugit suleriaaseqarnissani nassaarissagaa, taanna Facebookimi allappoq.

Inuiaqatigiissutsimik pingaartitsivallaarneq ernumassutigigaa
Taamatulli oqariartuuteqarnerup ernumaneq asuliinnaanngitsoq akornanniippoq. Taassuma nipaatsut aamma amerlanerussuteqartut akerliullutik qinersinerannik tamanna nalilerpaa, kamannermullu pissutaasut annerpaat marluk nalilerpai.

- Siullermik naligiinnginneq annertuvut, inuiaqatigiinnilu tamanna pissaaneerunnermik misigititsivoq, taanna oqarpoq.

- Aappaattut qineqqusaarnerup nalaani ajortumik inuiaqatigiissutsimik pingaartitsivallaarnermik qineqqusaarnermik ingerlatsisoqarpoq, tamatumalu kamanneq annertusitippaa, Sara Olsvig naliliivoq.

Atuaruk: Trumpip ajugaanerani qisuariaatsit

Nunatsinni pinaveersaartitsiniartoq
Nunani arlalinni pissutsit taamaattut qimerloorneqarsinnaasut, aammalu Tuluit Nunaata brexit pillugu taasineranni tamanna ersersimasoq, IA-mi siulittaasoq isumaqarpoq.

Naligiinnginneq aamma pissaaneerunnermik misigineq Nunatsinni taassuma takornartaannginnerarpai, taamatullu ineriartortoqarnissaanik pinaveersaartitsinissamik kaammattuivoq.

- Assigiinngissutsimut aamma assigiinngissitaarnermut inissaqartitsinissamut kiisalu akerleriinnerit pinngitsoorneqarsinnaanngitsut pitsaasumik aaqqiivigineqartarnissaannut annerusumik akisussaaffeqalerpugut, Sara Olsvig oqarpoq.

- Meeqqagut tamatuminnga ilinniartinnissaat pingaaruteqarpoq.

Nunarput eqqorneqarsinnaasoq
Donald Trumpip ajugaanerata kingornat, Nunatta soqutigisani suliarinissaanut USA-mut sukataarnerulertariaqassasoq, Sara Olsvigip (IA) nalilerpaa. Taassuma Pituffimmi pisut aamma sakkutooqarfiusimasuni iluarsartuussinissat tikkuarpai.

- Ukiumi nutaami USA-mi aqutsisut inissippata, Nunatsinni piumasaqaatigut ersarinnerulernissaat pingaaruteqarpoq.

- Ataqqeqatigiittumik paaseqatigiilluta suleqatigiinnissamik naatsorsuuteqarluta erseqqissassavarput, Sara Olsvig naqissusiivoq.