USA
Trumpip issittumi uuliasiorluni qillerinerit ammaanniarai
Præsident Obamap atorfimminut atatillugu kingullertut suliaasa ilagaat issittumi uuliamik misissuinerit uuliasiornerillu unitsinneri. Maanna Donald Trump peqqussummik atorunnaarsitsinissaq atsioqqammerpaa. Ilisimasallit taamaaliorsinnaatitaanngissoraat.
Præsident Donald Trumpip tallimanngormat peqqussut issittup imartaani uuliasiornermik ammaasseqqinnissamik imalik atsiorpaa.
Decemberimi præsidentiusimasup Barack Obamap issittup imartaani uuliamik misissuinerit uuliasiornerillu illersorniarlugit peqqussut atsiorpaa.
Peqqussut taanna Trumpip peqqussutiliaminik atorunnaarsinniarpaa.
- Peqqussut taanna uuliasiornermik suliffissaqartitsilluarsinnaasunik ammaassisuussaaq, Donald Trump ABC Newsimut oqarpoq.
Donald Trumpilli issittumi uuliamik misissuinerit taamaaliinnarluni aallarteqqissinnaanngilai. Tassami aalajangiinerni taamaattuni annertuuni ukiorpassuarni inatsisitigut akuersissuteqarnerit ingerlaqqaartarmata.
Avatangiisinut inatsisinut tunngasunik ilisimatooq naliliivoq, inatsit taanna, Obamap atugaa uuliasiornissamik ammaassinissamut illersuinermik imalik imaasiallaannaq atorunnaarsinneqarsinnaanngitsoq.
- Præsidentip sumiiffiit illersorneqartut tikkuartorsinnaavai, taamaattorli illersorneqarnerat imaasiallaannaq atorunnaarsissinnaanngilai, Rob Verchick, Loyola Universitymi New Orleansimiittumi avatangiisinut tunngasuni professori ABC Newsimut oqarpoq.
Ilisimasallit allat taamatut naliliinermut isumaqataapput.