True North Gems: Rubininik piiaavissami sanaartorsinnaalerpugut

True North Gems Greenlandimi pisortap Bent Olsvigip nalunaarutigaa suliffeqarfik rubineqarfimmi safirinillu aappilarujuttunik peqarfimmi Aappaluttumi sanaartornissani aallartissinnaaleraa.

True North Gems-ip pappilissanik nalilinnik niuerfimmi Canadami Torontomiittumut nalunaaruteqarpoq, True North Gemsi aammalu entrepenørit norskit LNS 11 million canadamiut dollariannik True North Gems-imut True North Gems Greenland-imullu aningaasaliinissamik isumaqatigiissuteqareersullu.

Aningaasaliinerit 58 million koruuninik naleqarput.

Taamaasilluni piiaavissami sanaartornissat atortussallu akissaqartinneqalerput, kingusinnerusukkut piiaanissaq suliareqqiinissallu aallartissinnaalerlutik.

Bent Olsvig Jensenip naatsorsuutigaa sanaartornissat qanittumi aallartinnissaat. Massakkulli assartuussinissanut allallu pilersaarusiornissaat kisimi amigaataaginnalerput.

Isumaqatigiissut
- Piiaavissamut ineriartortitsinissamullu tunngatillugu isumaqatigiissut taanna pitsaanerpaasimavoq”, Bent Olsvig Jensen, qaammatini kingullerni aningaasaliisinnaasunut arlalinnut isumaqatigiinniareerluni, tusagassiutinut nalunaarummi nassuiaavoq.

Piginneqataasoq tassaavoq norgemiut entrepenørit LNS (Leonhard Nilsen & Sønner), Kalaallit Nunaanni suliffeqarfiutimikkut LNS Greenlandikkut True North Gems Greenland-imik 20 procentimik piginneqataareersut.