True North Gems: Politikkikkut atorfinitsitsinerunngilaq

Demokraatit siulittaasuat Jens B. Frederiksen aatsitassarsiortitseqatigiiffimmi True North Gems Greenlandimi Qeqertarsuatsiaat eqqaanni rubinisiornissamik qinnuteqartumi sulisoqarnermut sillimaniarnermullu akisussaalissaaq. True North Gems Greenlandimi pisortap Bent Olsvig Jensenip atorfinitsitsinerup politikkimut attuumassuteqarneranik oqalunneq ilumuunnginnerarpaa.

Bent Olsvig Jensen siornatigut Demokraatit siulersuisuunerini ilaasortaasoq maanna True North Gemsimi pisortaavoq. Taannaavoq aamma Jens B. Frederiksenip suliffeqarfimmi tassani executive vicepresidentitut atorfinitsitsisoq. True North Gems Greenlandimi Jens B. Frederiksen sulisoqarnermut sillimaniarnermullu akisussaalerpoq.

Politikkikkut uumisaarutit
- Inuit atorfinitsitsinermut isornartorsiuisut, politikkikkullu atorfinitsitsineraallutik oqaluttut imaluunniit kammalaatersorneraallutik oqaluttut suliffitsinnut ilisimasaqaqqatulluinnartut taamatullu aamma aatsitassarsiornerup qanoq ingerlanneqartarneranut ilisimasaqaqqatulluinnartut. True North Gems Greenland suliffeerannguuvoq – taaneqartartoq junior exploration company – Nuummi pingasunik sulisulik nunarsuullu sinnerani tallimanik. Akissaqartinngilarput atorfinitsitsissalluta suliassaqanngitsunik – oqaatigissavaralu suliassat maani sullivitsinni amingaataanngilluinnarmata, Bent Olsvig Jensen tusagassiutinut nalunaarummini allappoq.

Taassuma oqaatigaa sillimaniarnermut tunngasunik suliffeqarfimmik nunatta avataaneersumik toqqaasimasinnaasimagaluarlutik nunani tamalaani piumasaqaatinik alapernaarsuinissamullu namminersorlutik oqartussat piumasaqaataannik naammassinnissinnaasunik.

- Suliassat nunat allamiut isumannaallisaanermut suliffeqarfiutaannut imissutigikuttoorsinnaagaluarpagut, aalajangerpugulli nammineq suliffiliorniarluta, sulisugullu nammineq ilinniartillugit sulisillugillu. Sulisut taakku nassaarinissaat aqunnissaallu pillugit ilaatigut Jensi atorfinitsipparput, Bent Olsvig Jensen oqarpoq.