Suliniutit angisuut
Transparency: Suliniutit angisuut pillugit tusarniaaneq sivitsorneqarli
Suliniutit angisuut pillugit inatsip allanngortinneqarnissaanut tusarniaanerit sivitsorneqartariaqartut Transparency Greenlandimit oqariartuutigineqarpoq
- Transparency Greenlandimit matumuuna kaammattuutigineqarpoq suliniummut angisuumut sanaartornerup nalaani nunanit allamiut najugaqarnermut sulinermullu akuersissutisisinnaanerat pillugu Kalaallit Nunaanni Inatsisissatut siunnersuutip tusarniaassutiginera pillugu tusarniaaneq minnerpaamik sapaatip akunnerinik pingasunik sivitsorneqassasoq.
Transparency Greenlandip siulittaasua Anita Hoffer nalunaaruteqarpoq.
Kommuneqarfik Sermersuup borgmesteriata Asii Chemnitz Narupip tusarniaaneq sivikigalugu Naalakkersuisunut isornartorsiuereerpoq.
Tranparency Greenland Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmit qarasaasiakkakkut allagarsivoq maajip arfineq pingajuani. Suliniummut angisuumut sanaartornerup nalaani nunanit allamiut najugaqarnermut sulinermullu akuersissutisisinnaanerat pillugu Kalaallit Nunaanni Inatsisissatut siunnersuutip tusarniaassutiginera pillugu allagaq imaqarluni. Tusarniaanermi akissuteqarnissamut killigitinneqarpoq maajip 16-at, piffissaliunneqarput ullut arfineq pingasut, taakkunannga ataaseq nalliuttuulluni.
Killeqartumi inerniliisinnaaneq
- Nalinginnaasumik Transparency Greenland-ip suliat ataasiakkaat isummersorfiginiartanngilai, kisianni siusinnerusukkut kaammattuutiginikuuarput, tusarniaanerit minnerpaamik sapaatit akunnerinik sisamanik sivisussasuseqartussaatitaanerat malinneqartassasoq, taamaalillutik susasssaqartut periarfissaqarniassammata.
- Tamakku tamarmik piffissamik naleqarput, piffissaliussallu sapaatit akunneri sisamat inorpagit tusarniaanermut akissuteqaatip pitsaassusaanut sunniuteqassaaq, taamaalillunilu oqartussaaqa-taassutsip aqqani pitsaanerpaamik akuusinnaaneq innarlerneqassalluni. Tusarniaanermi sivikit-sumik piffissaliisoqartillugu innuttaasut akuunissamut periarfissaqarnerat annertuumik annikillisarneqartarpoq, Anita Hoffer nassuiaavoq.