qinersineq

Transparency: Kalaallit Nunaat politikkikkut ineriartorpoq

Kalaallit Nunaanni politikkikkut suli peqquserluttoqarlunilu pissaanermik atornerluisoqartaraluartoq ilorraap tungaanut ingerlasoqartoq Transparency International Greenlandip siulittaasua oqarpoq

Transparency International Greenlandip siulittaasua Anita Hoffer

Inatsisartunut qinersinissamut oqallinnermi ilaatigut eqqartorneqarput Kalaallit Nunaanni suli politikkerit akukitsumik suli peqquserluttartut kiisalu pissaanermik atornerluisartut.

Ilorraap tungaanulli ingerlasoqarpoq. Kalaallit Nunaanni kikkut tamat oqartussaaqataanerat ineriartuinnavippoq. Aleqa Hammondip aningaasanik atornerluisimanera pillugu oqallinnerit kikkut tamat oqartussaaqataanerannut iluaqutaavoq.

Kalaallit Nunaanni peqquserluttoqannginnissaa anguniarlugu suliniartoq, Transparency International Greenlandimi siulittaasoq Anita Hoffer oqarpoq.

Oqartussaaqataanermut suliaq annertooq
- Kalaallit Nunaat politikkikkut inerisarpoq. Ammanerusumik sullissisoqarnissaa sulissutigineqartorujussuuvoq - tamanna sulissutiginera annertusiartuinnavippoq. Kalaallit Nunaanni politikkikkut peqquserluttoqaqqissinnaavoq. Danmarkimi aamma tamanna pisinnaavoq, Anita Hoffer Ritzau-imut oqarpoq.

Aleqa Hammondip aningaasanik atornerluisimanera pissutaalluni Inatsisartunut qinersisoqartussanngorpoq. Taamatut pisoqarnera politikkerit eqiissutigigaat Anita Hofferip oqaatigaa.

- Peqquserluttoqarsimagaangat kinguneqartitsisoqartalernikuuvoq. Qinersisartut aalassaatigisarpaat taamatut pisoqaraangat. Nuummi pissutsit taamaattut takuneqarsinnaapput.

- Politikkerit pissaanermik tigummiaqaleraangata namminneerlutik suliarerusutatik aallutilersarnikuuaat, innuttaasunik peqataatitsiunnaarlutik siornatigut, Anita Hoffer oqarpoq.

Pissutsit nutaat
Anita Hofferip oqaatigisaanut antropologip innuttaasunillu ilisimatuup Klaus Georg Hansen tapersiivoq.

- Peqquserluttarnerit ingerlaannaq anigorneqarsinnaanngillat, siornatigulli ataavartuunikuupput. Ullutsinni oqallisigineqarnerusalernikuupput, allannguutini taanna annertunersaavoq, Klaus Georg Hansen Ritzauimut oqarpoq.

Powered by Labrador CMS