Tuesday, October 10, 2017 - 18:48

Transparancy: Krusep isertuussiniarnera 'tupannartoq'

Formand for Transparency Greenland er 'rystet' over Karl Kristian Kruses svar
Assi.: Youtube
Tamat naalakkersueqataanerannut naapertuutinngilaq Aalisarnermut piniarnermullu Naalakkersuisup siunnersuutigineqartutut kinguppanniarnermi allannguutissanut naatsorsuutit inatsisilerinikkullu naliliinerit tunuliaqutaasut Inatsisartunut oqaluttuarinianngimmagit

Peqquserlunniartoqarsinnaaneranik alaatsinaatsoq Transparency tupigusuppoq aalisarnermut inatsisissami allannguutissatut siunnersuutit kingunerisassai pillugit Siumut sinnerlugu aalisarnermut Naalakkersuisoq Karl-Kristian Kruse Inatsisartunut paasissutissiinianngimmat. 

- Tupappunga, issuarsinnaavarmalu. Suliniaqatigiiffiuvugut ammasumik akimullu ersittumik ingerlatsinissaanik illersuisut, uanilu taamaattoqarneranik oqartoqarsinnaanngilaq, siulittaasoq Anita Hoffer AG-mut aqagu pingasunngornermi saqqummertussami oqarpoq.

- Isumaqarpunga tupinnartoq paasissutissat pingaarutillit Inatsisartunut isertuunniarneqarmata tunngavilersuutigineqarluni inatsisissatut siunnertuut suli Inatsisartunit oqaluuserineqanngitsoq. Imminut assortuuppoq, Anita Hoffer oqarpoq. 

Atuaruk: Aningaasaqarnermut naalakkersuisoqarfiup aalisarnermut inatsit isornartorsiorpaa

Allagaatinik takunnissinnaatitaanermik itigartitsineq

Attaviitsoq siusinnerusukkullu Demokraatini ilaasortaq Michael Rosing § 37 naapertorlugu apeqqummi Kruse qinnuigaa kinguppanniarnermi pilersaarutaasutut allannguutissani naatsorsuinerit saqqummiuteqqullugit kiisalu aperaluni sooq ingerlatsiviup allagaatit takuneqarnissaanissaat itigartinneraa. 

Allannguutissat ilaatigut Royal Greenlandimit Polar Seafoodimillu sakkortuumik isornartorsiorneqarput ingerlatseqatigiiffit atugaannik annertuumik allannguisussaammata, aningaasaqarnermik ilisimasallit nunatta karsianut akisussanerarlugit inatsisilerituullu isumaqarlutik uppernarsaatissatigut amigarpallaarlutillu suliarilluagaanngitsut. 

Atuaruk: Kruse ''eqqissisimatitsiniarluni'' paasissutissanik isertuussivoq

Michael Rosingimullu akissummini Karl-Kristian Krusep ilaatigut piffissaligaanngitsumik pisassiinerit taamaatinnissaannik aalisartunullu ingerlatseqatigiiffissuarnut pisaassaminnik tuninisimasunut utertitsinissamik isummaminut tunngaviusut inuiaqatigiit aningaasaqarnerannut silatusaarnerunersut isertuuttuarsinnarpai. 

- Naalakkersuisunut pingaartuuvoq erseqqissassallugu aalisarnermik inatsisip nalilersuiffigeqqinnerani sukumiisumik aningaasatigut kingunerisassaannik naatsorsuisoqarsimasoq, Kruse akivoq, Naalakkersuisulli naatsorsuineri tunniukkumanagit isumaqarami 'inatsisissamik piareersaataasut'. 

Allaaserisaq tamakkerlugu AG aviisimi aqagu pisiniarfinni pisiassaalertussami atuarsinnaavat. Massakkullu aviisi uani pisiarisinnaavat:

Seneste nyheder / Nutaarsiassat kingulliit