Torrak: Futsalertartut tamarmik ujaminnattut

Arctic Winter Gamesertoqarnerani futsalimi arfininngormat pissartanngorniutivittoqarpoq, kalaallit peqataatitaat iligiit sisamat tamarmik finalerput.

Niviarsiaqqat nukarliit siulliullutik unammipput. Taakku unammiuaarnermi Albertamut pissartanngorniutivinnginnerminni ingerlalluarput. Taakkulu pissartanngorniutivinnermi pakatitsisitsinngillat, niviarsiaqqallu ajugaarujussuarput. Taakku 12-1-imik ajugaapput. Asii Berthelsen arfinilinnik isertitaqarluni isertitat affai isertippai.

Pissartanngorniutivinnerup aappaani kalaallit juniorit nukappiaqqat Alaskamut unammipput. Unamminermi siuliani 2-2-ramik pissanganassamaarput.

Kisianni tassani kalaallit nukappissat finalimi pisassaanngillat, qularnaatsumillu 8-2-mik ajugaapput.

Arfininngornermi pissartanngorniutivinnerit pingajuanni kalaallit U14-it Ruslandimeersunut Yamalimut unammipput. Unammineq pissanganarpoq – russit unamminerup aallartinnerani siuapallapput. Unamminerup immikkoortuani siullermi tamarmik periarfissarseqattaarput, tassanilu russit måliniittoq anisillugu amerlanerussuteqarlutik saassussisaqattaarput. Unamminerup immikkoortuani siullermi kalaallit isertitsiffigeqqinneqarput.

Mumiliivinnermi kalaallit pingaarutilimmik isertitsipput, mumikkamik 2-1-erlutik. Unamminerup immikkoortuata aappaani kalaallit nukappiaqqat pisassaanngillat, tamannalu angusaqarfiuvoq. Målinik marlunnik kinguaqqareerlutik isertitseqqikkamik 2-2-ramik naligiilerput. Kalaallillu unamminerup immikkoortuata aappaani aalajangiisumik isertitseqqipput, unamminerullu sinnerani isertitsisoqaqqinngilaq, kalaallillu 3-2-mik ajugaapput.

Ullormi tassani pissartanngorniutiviffiusumi kalaallit juniorit niviarsiaqqat kingulliullutik unammipput. Taakku Northwest Territoriesimeersut naapippaat. Ajoraluartumillu kalaallit nivissat arsarluartunut 4-2-mik ajorsarput.

Taamaalilluni kalaallit futsalertartut Arctic Winter Gamesimi pingasunik kuultinnapput, ataatsimillu sølvinnallutik.