Puisip amia
Torlorsortartup Tanya Tagaqip assinga peerneqartoq
Erinarsortartoq ilisimaneqarluartoq maanna Kalaallit Nunaanniittoq, puisip amertalimmik assimik ikkusimasaanik Facebookip piigaqarnerata kingorna, puisip amianik assimik saqqummiusseqqippoq
Canadamioq torlorsortartoq Tanya Tagaq kissassaasuulluni Zednap Katuami Nuummi tusarnaartitsinnginnerani, Facebookip assi Facebookimi quppernerminut ikkussimasaa peerpaa.
Assimi puisip amianik kavaajaliaq takuneqarsinnaavoq.
Erinarsortartoq Twitterimini taama allappoq, pisoq tusagassiorfinnit arlalinnit allaaserineqareerpoq.
- Ikinngutima nammineerluni puisip amianik kavaajaliaa saqqummiukkakku asserneqarlungalu Facebookimi nalunaarutigineqarpunga, Tanya Tagaq allappoq.
Puisip amianik illersuisoq
Tanya Tagaq nunap inoqqaavisa pisinnaatitaaffiinik illersuisutut ilisarisimaneqarpoq, inuillu nittartakkakkut attaveqatigiittarfiini saqqumilaartuuvoq. Facebook sisamanngormalli utoqqatsereersoq taanna ilisimatitsivoq, kisianni pisup kingorna erinarsortartup puisinniartarnermut puisillu amianik atisaliortarnermut tapersersuinini takuteqqereerpaa.
Tallimanngornermi ulloq taanna Nuummi tusarnaartitsisussaalluni, pisiniarfimmi puisip amianik kavaajalerluni imminut assilivoq, assinilu Twitterimut ikkuppaa.
- Puisip amianik kavaajaq una Kalaallit Nunaanni nassaareqqammerpara, taanna allappoq.
Kalaallinik nuannarinnittoq
Ullormi tassani Canadamiup Kalaallit Nunaannik nuannarinninnini oqaatigaa. ''Kalaallit Nunaannut asannilersoorpunga'' aamma ''Kalaallit sumiorpalussusaat tusarneq'', Tanya Tagaq Twitterimi allappoq.
Tagaq arfininngornermi Sisimiunut aallarpoq, ullormilu tassani Kalaallit Nunaat ''nunarsuarmi nuannarinerpaalerlugu'' allappoq. Twitteriani torlorsortartoq qimussertoq aamma takuneqarsinnaavoq.