Torben A.: Kalaallit Nunaat sulisussanut avataaneersunut ammaassisariaqarpoq

Aningaasaqarnermut Siunnersuisoqatigiit siulittaasuat Torben M. Andersen Naalakkersuisunut ersarissumik oqariartuuteqarpoq: Nunap avataaneersunik sulisussarsiortarnermut malittarisassat sukannersut eqaannerulersinneqartariaqarput. Taamaanngippat mittarfiliortiternissamik suliniut suliniutillu allat kinguaattoorsinnaapput, akisunerulersinnaallutik imaluunniit suliarineqanngitsoorsinnaallutik.

Pisariinnerujussuarmik eqaatsumillu aaqqissuussinissaq maannakkorpiaq atorfissaqartinneqarpoq, allaffissornerujussuartaqaranilu tusarniagassarpassuaqarani nunat allamiut sulinissaannut nunamiisinnaanerannullu suliani ataasiakkaani isummertussanik, ilisimatooq Torben M. Andersen oqarpoq

Kalaallit Nunaata Aningaasaqarneranut Siunnersuisoqatigiinnit sulisussanik nunanit allaneersunik pisariaqartitsinerup annertuujunera annertusiartuinnarneralu qanittukkut erseqqissaatigineqaraluartoq, siunnersuisoqatigiit siulittaasuannit Naalakkersuisut nunanit allaneersunik tikisitsisarnerup unikaallatsinneqarnissaanut maanna mianersoqquneqarput.

Sermitsiaq allappoq.

Kalaallit Nunaanni naalakkersuisut maanna iliuuseqartariaqarput. Sulisartunut avataaneersunut maleruagassat maannakkornit eqaannerusariaqarput, aningaasaqarnermut professori Torben M. Andersen isumaqarpoq. Naalakkersuisut Naalakkersuisut siulittaasuat Kim Kielsen siuttoralugu avataaneersunik sulisussarsiortarnerup ajornarnerulersinnissaanik piffissami sivitsortumi suliaqarsimapput. Tamannalu professorip ernumanartoqartippaa.

Ineriartorneq unikaallatsinneqartoq
”Suliffeqarfiit sulisussarsioraangata anguniarneqartut tassaasariaqarput sulisussanut avataaneersunut taarsiullugu nunaqavissut. Kalaallit Nunaannimi suliffissaaleqisoqartillugu sulisussanik avataaneersunik tikisitsiuartoqartarnissaa ilumoorsinnaanngilaq.” Sulisussanut nunanit allaneersunut politikkip tamanna qiterpiaraa, naalakkersuisoqatigiinnissamut isumaqatigiissummi ukioq manna maajip 15-ianeersumi allassimasoq.

– Politikki taanna sanaartornermik ingerlatanut Kalaallit Nunaannilu inuussutissarsiornikkut sanaartornikkullu suliniutinut angisuut aallartissinnaanissaannut sunniuteqartorujussuuvoq. Isumaga naapertorlugu taamatut ingerlaaseqarneq kukkuneruvoq. Kalaallit Nunaanni innuttaasut sapinngisamik amerlasuut suliffissaqartinneqarnissaat akissarsiarissaarsinnaaqqullugillu piginnaasaqarluarnissaat soorunami pingaartuuvoq. Ajornartorsiulli tamanna avataaneersunik Kalaallit Nunaannut tikittoqarsinnaajunnaarlugu iliuuseqarnikkut aaqqiivigineqarnavianngilaq. Ilinniartitaaneq suliniutillu allat aqqutigalugu aaqqinneqartussaavoq, Torben M. Andersen Sermitsiamut oqarpoq.

Allaaserineqartoq tamakkiisumik aviisimi Sermitsiami, aqagu tallimanngornermi saqqummersussami, atuarneqarsinnaavoq. Aviisi uani pisiarineqalereersinnaavoq:

Powered by Labrador CMS