Toqutsisutut unnerluutigineqartoq: Uneqqullugit arfineq-marloriarlunga suaarpunga

19-inik ukiulik Skagenimeersoq ketaminitoreerluni niui nikissinnaajunnaarput - iisartagaq ilaatigut hestit sinitsinneqarnerinut atorneqartartoq.

Angutit pingasut januaarip 16-ianni unnukkut angutip 20-nik ukiullip pisititsisuusup inaanut isernerannut tamanna pissutaatinneqarpoq.

Taakku anusinngorsarniarsimavaat, kisianni pillaatissiiniarneq ingasappallaalersimavoq.

42-nik ukiullip tamanna nassuiarpaa, taanna tallimanngornermi suliaq pillugu Hjøringimi eqqartuussivimmi nassuiaateqarpoq.

- Niaquata saarnga minnerpaamik ataasiarluni neeqquluppaluttoq tusaavara, unitsitseqqullunilu nilliavoq, angut 19-inik ukiulimmut sinissaammik pisimasumut akkaajuvoq.

Taanna 42-nik ukiulik - angutit allat pingasut peqatigalugit - angummik 20-nik ukiulimmik toqutsisimasutut unnerluutigineqarpoq.

Persuttarneqartoq inissiami Skagavejimi Skagenimi januaarip 16-anni ilisimanngitsoq nassaarineqarpoq.

Inissiami perulluliortoqarnerata kingorna, inissiarsuarmi ineqartut politiinut nalunaaruteqarsimapput.

Persuttarneqartoq aqqunartitersimaqaaq, niaqqumigut baseballbatimik, nukkassaatit atortuinik ipittaammillu anaalerneqarsimavoq. Aammattaaq tunumigut savinnik qiuutinillu kapineqarsimavoq.

Taanna qulimiguulimmik Aalborg Universitetshospitalimut timmisartuunneqaraluarpoq, kisianni inuunera annaanneqarsinnaasimanngilaq. Ullut marluk qaangiummata siniinnalerpoq.

42-nik ukiullip persuttarneqartoq arlaleriarluni baseballbatimik anaalersimallugu nassuerutigaa. Pinerloqataasup sakkoq tigoriarlugu anaalerpaa, naak 42-nik ukiullip nassuiaanera naapertorlugu arfineq-marloriarluni uneqqullugu suaartaraluartoq.

Tamatuma kingorna qimappaat, kisianni angutit 28-nik aamma 29-nik ukiullik uterlutik ''suliaq naammassiartorlugu'' uterput, 42-nik ukiulik oqaluttuarpoq.

Taassuma unnerluutigineqartut marluk toqutsinermut pisuunerpaasutut tikkuarpai.

Kisianni nammineq peqataasimanini nassuerutigaa.

- Soorunami anaalerummik anaalersimaneranut pillagaassaanga. Kisianni uanga toqunneqarnissaa siunertarinngilara. Nukappiaratsialaavoq. Nuannarisaraaralu, taanna 42-nik ukiulik oqarpoq.

Pingasut ilaata ataatsip nakuuseqataanini nassuerutigaa, allat marluk pinngitsuunerarlutik.

42-nik ukiulik ulorianangaarmat killiligaanngitsumik paarnaarussaanissaa, unnerluuteqartoq Peter Rask isumaqarpoq.

Unnerluutigineqartut sinneri pingasut nalinginnaasumik paarnaarunneqarnissaannut piumasaqarfigineqarput.

Suliap januaarimi naammassineqarnissaa naatsorsuutigineqarpoq.

Aamma atuakkit:

Skagenimi angutip kalaallip toqutaaneranut unnerluutigineqartut

Mikip Skagenimi toqutaanera paasisaqarfigiuk