Friday, July 14, 2017 - 11:51

Toqutsisoqarnerani suliaq malunngorpat aallartissaaq

Assi.: AP Photo/Frank Augstein
Birna Brjánsdóttirip toqunneqarnerani suliaq marlunngorpat Reykjavikimi eqqartuussivimmi aallartissaaq

Angummut 30-nik ukiulimmut Birna Brjánsdóttirimut toqutsisimasutut unnerluutigineqartumut suliaq marlunngornermi juulip 18-anni aallartissaaq.

Suliaq ullut eqqartuussiffiusut pingasut tallimallu akornanni sivisussuseqassasoq naatsorsuutigalugu, suliami unnerluussisussaatitaasup, Kolbrún Benediktsdóttirip, Sermitsiaq.AG-mut ilisimatitsissutigaa.

Taamaattorli ullup eqqartuussiffiusup siulliup kingorna suliaq aatsaat aggustimi ingerlaqqikkumaartoq naatsorsuutigaa.

Unnerluunneqartoq oqalutseqartinneqassaaq, taanna kalaallisuumut nutserissaaq, taamaalilluni taanna eqqartuussinermut malinnaaniassammat.

Suliami aamma killisiuineq oqalutsi aqqutigalugu ingerlanneqassaaq.

30-nik ukiulik suli pinngitsuunerarpoq.

Polar Nanormi inuttat aamma suliami killisiorneqassapput.

Birna Brjánsdóttir januarip 13-anni arfininngornermi ullaaralaakkut tammarpoq. Sapaatip-akunnera qaangiuttoq Reykjavikip kujataani sissami toqungasoq nassaarineqarpoq. 

Tammarnerata kingorna ullut arlaqanngitsut qaangiummata Polar Nanormi inuttat marluk tigusarineqarput. Aappaali pinngitsuutinneqarpoq.

Angummut 30-nik ukiulimmut politiit suliami uppernarsaataasa ilagaat, Birna Brjánsdóttirip aava biilimi taassuma attartorsimasaani nassaarineqarsimanera.

Suliaq pillugu uani paasisaqarnerusinnaavutit

Seneste nyheder / Nutaarsiassat kingulliit