Nuuk
Toqutsisoq eqqartuunneqarpoq taarsiisussanngorlunilu
Angut 44-nik ukiulik aapparminut toqutsisimasutut maajimili tigummigallagaasoq maanna eqqartuunneqarsimalerpoq. Annersaaneq toqumik kinguneqartoq aappariit meeraat isiginnaartut pivoq
Sermersuumi Eqqartuussiviup angut 44-nik ukiulik maajip 29-anili tigummigallagaalersimasoq marlunngormat eqqartuuppaa. Angutip aappani 38-nik ukiulik maajip 29-ani toqumik kinguneqartumik annersarujussuarpaa.
Angut pineqaatissinneqarsimasunut inissiisarfimmiittussanngortinneqarpoq ukiuni arfineq marlunni. Taassuma saniatigut aappariit ataatsimoorlutik meeraannut aamma angutip arnallu immikkut meeraannut katillugit 266.000 koruuninik taarsiisussanngortinneqarpoq.
Taama Politimestereqarfimmit unnerluussisussaatitaasoq, Iben Børge, Sermitsiaq.AG-mut oqaluttuarpoq.
Atuaruk: Angut arnamik toqutsisimasutut unnerluutigineqarpoq
Atuaruk: Assit: Arnaq toquvoq - pisoq politiinit misissorneqarpoq
Annersarneqarujussuarpoq
Annersaaneq toqumik kinguneqartoq Nuummi blok 5-imi maajip 29-ani pivoq. Tassani angutip 44-nik ukiullip aappani 38-nik ukiulik tilluttarlugu tukertarlugulu annersarujussuarpaa aappariit meeraat arfineq marlunnik qulingiluanillu ukiullit aamma angutip ernera aqqaneq marlunnik ukiulik isiginnaartut.
- Sakkortoorujussuarmik annersarneqarsimavoq, Iben Børge oqarpoq.
Annersaaneq toqumik kinguneqartoq pillugu Sermitsiaq.AG-mit allaaserineqareersutut, politiit Nuummi Narsarsuarmi blok 5-imut unnuakkut pingasup missaani aggersarneqarput arnaq ambulancenik pisariaqartitsimmat.
- Politiit Blok 5-imut apuummata arnaq toqungasoq politiit siumorpaat. Inuunera annanniarlugu iliuuseqarput, Dronning Ingridillu napparsimavissualiaanneqarluni. Arnaq 38-nik ukiulik nalunaaqutaq 03.47 toqusoq nalunaarutigineqarpoq, politiit pisortaata tullia Pavia Kleist taamani Sermitsiaq.AG-mut taama nalunaarpoq.
Angut ukiuni arfineq marlunni pineqaatissinneqarsimasunut inissiisarfimmiittussanngortinneqarnermi saniatigut aapparigaluanilu meeraaminnut kiisalu angutip arnallu immikkut meeraannut taarsiisussanngortinneqarpoq. Taamaalilluni aappariit ataatsimoorlutik meeraat, aappaa arfineq marlunnik ukiliuk aappaalu qulingiluanik ukiulimmut immikkut 100.000 koruuninik taarsiisussanngortinneqarpoq. Aamma angutip ernera aqqaneq marlunnik ukiulik 60.000 koruunik taarsiivigineqartussanngorpoq, kiisalu arnap meeraa 17-nik ukiulik aamma 6.000 koruunik taarsiivigineqartussanngortoq.
Arnaq toqunneqartoq aamma allamik 20-nik ukiulimmik meeraqartoq, inersimasuummalli taarsiivigineqartussaanngitsoq, Iben Børge ilisimatitsivoq.