Toqusoq: Kalaallit eqqumiitsuliortarneranni ulloq alianartoq
Eqqumiitsuliortoq Rama King Nash 42-nik ukioqarluni Perumi angalatilluni toquvoq. Taamaalilluni kalaallinut eqqumiitsuliortunut ambassadøri qimaguppoq.
- Inummik aamma eqqumiitsuliortumik sulerusussusilerujussuarmik annaasaqariasaarneq paasisinnaanngilaram eqqumiitsuliortut kattuffianni Kimimmi siulittaasuusimasoq, Lisbeth Karline Poulsen, Rama King Naship toqoriasaarnera pillugu Sermitsiaq.AG-mut oqaluttuarpoq. Taanna akunnittarfimmi unnuiffigisamini nassaarineqarpoq.
Rama King Nash arlaleriarluni iluatsilluartumik Nunatsinni saqqummersitsinikuuvoq. Aamma Kimimmi ilaasortaasimavoq.
- Qaqutigoortumik naammassisaqarumatuujuvoq. Aporfeqarani assigiinngitsorpassuarnik suliaqarpoq, akrylinik, linoleuminik aamma kanngussat atortarlugit, Lisbeth Karline Poulsen Kimimmi ilaasortaq pillugu oqaluttuarpoq, taanna Nunatta avataani eqqumiitsuliortut akornanni attaveqarluarnermigut kalaallit eqqumiitsuliortarnerannut eqqumiitsuliortuinullu ambassadøriulluarsimavoq.
Qalipaateqarluartoq
- Taassuma suleriaasaa immaqa inuit ilaannut nipituuliorneruvoq. Kisianni isumaga malillugu avatangiisit qalipaatigissut misigisani saqqummiullugillu oqaluttuarisarneri nuannaarutissaapput, Kimimmi siulittaasuusimasoq oqaluttuarpoq.
- Assersuutigalugu seqernup tarrikkiartorneri. Seqernup tarrinnerinik kusanartorsuarnik takusaqarnikuuvoq, taakkulu tiguartisimaffigisorujussuuai, taanna ilanngullugu oqarpoq.
Pikkorissaasartoq
Rama King Nash Nunatsinni arlaleriarluni pikkorissaasarnikuuvoq, ilisimasaminillu aamma periutsinik assigiinngitsunik tunniussaqarluartarluni.
Lisbeth Karline Poulsenip eqqumiitsuliortoq qalipaatigissaartoq, kialaartoq qiimasorlu maqaasissavaa.
- Qanilaartuuvoq, tamatumalu eqqumiitsuliornerup silarsuaani Kalaallit Nunaannit ungasissumit attaveqarluartippaa, tamannalu uagut atorluarnikuuarput, taanna oqarpoq.
Rama King Nash Mexicomiut eqqumiitsuliornermut ilinniarfianni Mexico Citymi ilinniarsimavoq, Københavnimilu assilialiornermut aamma Firenzemi ‘’Il bisonte’’-mi assiliartalersuinermut ilinniarfimmi ilinniarsimalluni.
Rama King Nashimi videoliaq takuuk, tassani Kalaallit Nunaannut angalasarnini ilaatigut oqaluttuarai.
Taassuma arnaa qallunaajuvoq, angutaalu Mexicomiuulluni. Arnaminit aataagaa eqqumiitsuliortoq oqallissaarisartoq Jørgen Nash, maanna toqoreersoq.