Folketingimit video
Toqqaannartumik malinnaagit: IA uranimik tusarniaatitsivoq
Immikkut ilisimasallit ullumi Folketingimi Kalaallit Nunaannut Ataatsimiititaliamut urani pillugu annertunerusumik paasissutissiissapput
Nunatta nalunaaqutaa malillugu nalunaaqutaq qulingiluanut Folketingimi uranii pillugu tusarniaaneq aallartinneqarpoq. Tamanna toqqaannartumik malinnaavigisinnaavat linki una atorlugu.
Inuussutissarsiornermut siuarsaanermullu ministerip Troels Lund Polsenip (V), parteeqanni Marcus Knuth (V), Kalaallit Nunaannut Ataatsimiititaliami siulittaasoq, peqatigalugu tusarniaaneq ammaqqammerpaa.
Folketingimi tusarniaanermi, politikerit sammisaqarfimmi aalajangersimasumi immikkut ilisimasaqarnerpaanut apeqqarissaaruteqarsinnaapput.
Urani akerlilersorpaa
Periuseq tamanna atorneqartarsinnaavoq, allassimasutut ´Folketingimi politikerit pinasuartumik paasissutissanik pisariaqartitsigaangata´. Inuit Ataqatigiillu isumaqarput pisariaqartitsineq tamanna atuuttoq.
Partiip illua'tungiliuttup, ullumi tusagassiorfinnut nalunaarutikkut taasamisut, demokratiskiunngitsumik ´innuttaasut Inatsisartullu avaqqullugit´aalajangiinermut, akerliunini aalajangiusimavaa.
Tamatumani partiip pingaartumik eqqarsaatigaa 2013-imi oktobarip 24-anni uranimut akuersaanngilluinnarnerup Inatsisartuni atorunnaarsinneqarnerata kingorna qallunaat naalakkersuisuisa Naalakkersuisullu inatsisiliorlutik aallartitsisimanerat.
Aaja tusarniaatitsivoq
– Uranimutd inatsisissatut siunnersuut Folketingimi siullermeerneqassaaq Inatsisartut ataasimiinnissaat sioqqullugu, taamaasillunilu imaattoqalissaaq, Folketingi inatsisinik Kalaallit Nunaannut tunngasunik suliaqassasoq Inatsisartut suliluunniit tusaaneqanngitsut - tamannalu allaat pivoq Naalakkersuisut akuersinerisigut, Inuit Ataqatigiillu isumaat malillugu tamanna ileqqorluttuliorneruvoq, folketingimut ilaasortaq Aaja Chemnitz Larsen (IA) oqarpoq.
Ullumi urani pillugu tusarniaasitsinermut taanna suliniuteqartuuvoq, tamatumunngalu pissutaapput ilaatigut uranimik isumannaatsuunermik nakkutilliinermut avammullu tuniniaanermik nakkutilliinermut inatsisit nutaat marluk. Tusarniaanerup nalaani peqatigiiffik uranimiut akerliusoq ´Urani naamik´ Folketingip saavani Christiansborg Slotspladsimi akerliussutsimik takutitsivoq.