Toqoraaviit naatsorsuutaat: Savaaqqat ikinnerit anginerusulli

Savaaqqat savallu ikinnerit taamaattorli anginerit tunineqarput. Uumasunik toqoraavimmut Neqi A/S-imut 2016-mi tunioraanerup tamanna angusaraa, suliffeqarfik ilisimatitsivoq.

Toqoraavik katillugu 278 tonsinik tunisassiorpoq, taakkulu 2015-imit 32 tonsinik amerlanerupput.

Atuaruk: Neqimut savaaqqat ikinnerusut

Qaffariarnissaat naatsorsuutaasoq
- Naatsorsuutigisimavarput siornamut sanilliullugu savaaqqat savallu ikinnerusut tunineqarnissaat. Nuannaarutigaarpulli 2014-miit 2015-mut ikileriaat annertooq maanna unikaallassimammat. Aappaagu 2017-mi tunisat ukiormannamut sanilliullugu qaffariarnissaat naatsorsuutigaarput, pisortaq Per Jensen, tusagassiuutinut nalunaarummi ilisimatitsivoq.

Savaaqqat ukiormanna tunisat oqimaannerunerat pissutigalugu Nunatsinni savaatilinneersunit nioqqutissianik pisisartut piumasaasa neqeroorutiginissaannut Neqi periarfissagissaarnerulissaaq.

Pisisartut piumasaat annertusissappata suliffissallu pingaarutillit attatiinnarneqassappata nunatta avataaneersunik nioqqutissiassanik 2017-mi pisiniarnissaq pisariaqassanersoq kingusinnerusukkut nalilersorneqassaaq.

Atuaruk: Neqi savaaqqanik Islandimut aallerpoq

Naatsiiat
Naatsiiat naatinneqarnissaannut, maskinat pisiarineqarnissaannut katersuivimmillu pilersitsinissamut nunaatillit Neqi A/S-imit suleqatigilluarneqarput. Toqoraaviullu niuertarfiit upernaap tungaanut pilersorsinnaanissaat naatsorsuutigaa.

Umimmaat
Arsuup kangerluaneersunik umimmannik misiligutaasumik Neqi ukiormanna pisivoq. Silagittuaannannginnera unammillernartortaqarluartoq tamaanngaaniit umimmannik misileraalluni pisiortorneq toqoraavimmit iluarisimaarneqarpoq. Misileraaneq aappaagu ingerlateqqinneqarniarpoq.

Kujataani uumasunik nunaatilinnit assigiinngitsunit assartuinermi nammineq umiarsuarisamik 'Viking II'-mik siullermeerluni assartuisoqarpoq.