Toku Oshima Qaanaammi meeqqanut ambassadørinngorpoq

Piniartoq illoqarfimmi meeqqanut katerisimaartitsisarpoq

MIO
MIO
MIO
MIO

Meeqqat Illersuisuata Aviâja Egede Lyngep Qaanaamiinnermini Toku Oshima Qaanaami Meeqqanut ambassadøritut toqqarpaa. Toqqaanermi tunngaviuvoq Tokup meeqqat pillugit kajumissutsiminik sulinera annertooq.

Tokup meeqqanik sammisassaqartitsisarneri soorlu mersornermik, iganermik meeqqanillu allanik katerisimaaqateqarnermik meeqqanut annertuumik pitsaasumillu naleqarneranik Meeqqat Illersuisuata Aviâja Egede Lyngep toqqaaneq tunngavilersorpaa. Tokup meeqqallu kaperlak ataqqinninnermik, toqqissisimanermik, qanilaarnermik ataqatigiinnermillu ilinniarnermut kaperlak atortarpaat. Assersuutigalugu ataatsimooraangamik oqarasuaatinik angallattakkanik atuisoqaqqusaanngilaq.

Tokup sammisassaqartitsineri nukappiaqqanut niviarsiaqqanullu sammisuupput, nalinginnaasumillu meeqqat ulluinnaanni, kulturiani oqaasiinilu tunngaveqarlutik. Ukioq manna eqimattat niviarsiaqqanik 12-inik nukappiaqqanillu 12-inik ilaasoqarput.

- Sammisassaqartitsinerit taakku pitsaasorpassuarnik kinguneqarput – meeqqat ataatsimoornerulertarput, imminnut pinngortitamullu ataqqinnittunngortarlutik. Toku pissusissamisoortumik Qaanaami meerarpassuarnut qitiusuuvoq. Suleqatigiinnerup kiisalu imminnut pinngortitamullu ataqqinninnerup pingaaruteqassusaanik ilinniartittarpai. Meeqqallu Tokumukarnissartik nuannarisarpaat, Tokumimi kikkut tamarmik tikilluaqqusaapput – aamma meeqqat artornartunik misigisaqartut, Meeqqat Illersuisuat Aviâja Egede Lynge taama oqarpoq.

Taamaasilluni Toku Naalagaaffiit Peqatigiit Meeqqat pillugit Isumaqatigiissutaanni meeqqat pisinnaatitaaffii tunngaviusut arlallit pillugit ssuliaqarpoq. MIO-p toqqaanermik matuminnga Toku sulinermi tamatumani tapersersorniarpaa, taamaasilluni sulineq taanna sumiiffimmi pissutsinik kulturimillu aallaaveqassammat.

Toku, ulluinnarni inuussutissarsiutigalugu piniartuusoq, sammisassaqartitsisarnini ima oqaaseqarfigai:
”Kulturip allanut ingerlateqqinnissaa pisussaatitaaffigaara – naluarami aqagu maaniissanerlunga”.

Meeqqanut ambassadørip suliassaraa, meeqqanut inuusuttunullu maligassiornissaq kiisalu meeqqat pisinnaatitaaffiinik takutitsinissaq.

Powered by Labrador CMS