Aappaluttoq
TNGG: Ujaqqat siulliit ukiassaru piariissapput
Qeqertarsuatsiaat eqqaanni rubinisiorfissap sanaartornerata inaarsarnera aallartippoq, Nuummilu laboratoria sanaartorneqarpoq. Ujaqqat tuneriaannaat siulliit ukiaru piariissapput
- Nuummi laboratorialiuleruttorpugut, tassanilu syre atorlugu ujaqqat salinneqartassapput. Ujaqqat siulliit ukiassalernerani piariissavavut, True North Gems Greenlandimi vicedirektør Jens B. Frederiksen aviisimut Sermitsiamut oqarpoq.
Kalaallit aatsitassarsiortitseqatigiiffiiat True North Gems Greenland A/S, Canadami, Norgimi Kalaallillu Nunaanni piginnittoqartoq, Nuup kujataani 160 kilometerisut ungasitsigisumi Qeqertarsuatsiaat eqqaanni Aappaluttumi marlunnik akuersissuttaateqarpoq.
Atuaruk: Rubinisiorfik Kalaallit Nunaannut milliardinik isertitsissutaassaaq
Avammut niuertunngussasoq
Aappaluttoq Sarfarsuup Iluata qinnguaniittoq qangarsuaanillu piniarfiuvoq. Rubinit pink safirillu TNGG-p akuersissutaani pineqarput.
Massakkorpiarlu Aappaluttumi nunap qaava issuiarneqarpoq, aqquserniortoqarluni sulisunullu inissianik sanaartortoqarluni, suliarlu tamanna suliffeqarfimmit maanngaanneersumit LNSG-mit ingerlanneqartoq manna inaarsarneqarpoq.
Suullu tamarmik pilersaarutit naapertorlugit ingerlassappata, Kalaallit Nunaat ukioq manna ujaqqanik pinnersaasianik avammut niueruteqartunngussaaq.
Piginnittut 2004-milli 300 million koruunit sinnerlugit suliniummut atorpaat, taakkunanngalu 150 million koruunit ujarlernernut atorlugit.
Atuaruk: TNG-mi sulinermi avatangiisitigut pisimasorpassuit
Isumaqatigiissuteqarnissamik naatsorsuuteqartut
GEUS naapertorlugu manna tikillugu piffimmi eqqaanilu rubineqarfiit 86-it ilisimaneqalereerput, ukiullu sisamat ingerlaneranni ujaqqat misiligutissat 165 tonsimik oqimaassusillit misissugassatut qallorneqarput.
Ujaqqat pinnersaasiassat 65.000 gramit, 129.700 gramillu sinnerlugit ujaqqat pinnersaasiassat akuitsuunngitsut rubinit pink safirillu taakkunannga piiarneqarput.
Atuaruk: Nunarput aatsitassanik piiaafinngoqqippoq
Suliffeqarfiup naammassilluni aatsitassarsiorfimmik piarernissaata tungaanut 79 million koruunit amigaatigigai, tusagassiorfiit qaammammi kingullermi oqaluuseraat.
- Massakkorpiarlu isumaqatigiinninnarnernik ingerlatsivugut, sivitsunngitsorlu isumaqatigiissutip inaarnissaa naatsorsuutigaarput, Jens B. Frederiksen erseqqissaavoq.
Atuaruk: Rubininik piiaaffik aallartinnissaminut millionilinnik amigaateqarpoq
Allaaserisaq tamaat uani sapaatip akunnerani Sermitsiami saqqummertumi atuaruk, ullumi pisiniarfinni pisiarisinnaalerpat. Aviisi aamma uani pisiarisinnaavat: