Sulinermi avatangiisit

TNG-mi sulinermi avatangiisitigut pisimasorpassuit

Aatsitassarsioqatigiiffiup True North Gemsip pisortaa oqarpoq kisitsisit aarlerinartoqartinnagit

True North Gems Greenland, TNG, rubinmine, Qeqertarsuatsiaat
True North Gemsip piiaaffiani qillerinerit kaattaanerillu ingerlanneqarput. Tamanna uloriananngitsuunngilaq

Aatsitassarsiorfimmi Aappaluttumi ingerlatsineq aallarteruttorpoq. Imalu sukkatigisumik sulisoqarsimagunarpoq, tamaaniinneq ulorianartoqalaarsinnaalluni. Qanoruup paasiniaanerata takutippaa Sullivinnik Nakkutilliisoqarfik Aatsitassanullu Aqutsisoqarfik, Qeqertarsuatsiaat eqqaanni sulinerup aallartinneraniilli, sulinermi avatangiisinut tunngasunik katillugit 19-inik suliaqarsimasutj.

Ingerlaannaq peqqussutit aamma ilaapput

Suliassat ukiup ataatsip iluani pisimapput rubininik piiaaffiup pilersinneqarneranut atatillugu, Sullivinnillu Nakkutilliisoqarfik ingerlaannaq peqqussutinik taaneqartunik sisamariarluni naalakkiisarsimavoq, tamakkualu taamaallaat pisarput suliffimmi annertunerusunik amigaateqartoqaraangat.

Pisimasut amerlanerpaat ingerlatsivimmut LNS Greenlandimut tunngapput, taassumalu piiaaffik sanallugulu ingerlappaa.

´Aarlerinartoqanngilaq´

Aatsitassarsioqatigiiffik True North Gems nammineq aalleriartoqartitsinngilaq, pisimasorpassuit pillugit Qanoruumit apersorneqarnermi kingorna.

Pisortaq Bent Olsvig Jensen oqarpoq pisut tamaviisa nalunaarsortarusullugit, erseqqissarpaalu tamakkununnga ilaasut pisut erloqinannginnerusut, assersuutigalugu sulisut ilaata sioqqanik ississimanera.

– Isumaqanngilanga ajutoornerit amerlassusaat aarlerinartutut oqaatigineqarsinnaasoq. Kisiannili soorunami tamakkua eqqumaffigaavut tamatigullu pinngitsoorniarsarisarlutigit, Olsvig KNR-mut oqarpoq.

Nammineerluni nalunaarsussavai

Ingerlatsiviit, sulisut kattuffiisalu sulinermi ajoqusernerit ajutoornerillu Sullivinnik Nakkutilliisoqarfimmut nammineerlutik nalunaarutigigajuttarpaat. Tamatuma saniatigut Aatsitassanut Aqutsisoqarfiup piumasaraa ajutuungajannermik taaneqartartut, inunnik ajoquserfiunngitsut, tamaasa namminerminut nalunaarutigineqartassasut.

Ajutuungajannerit tamakkua taaneqartunut 19-inut ilaapput.

MALINNAATITSINEQ: Pisortaq imminut illerpoq: Taamaattumik sulinermi avatangiisitigut suliassarpassuaqarpoq

Qanoruup pingasunngormat unnukkut ilanngussaa takuuk, taannalu aallakaatitami minutsit arfineq-marluk missaat ingerlareersut takutinneqarpoq

Powered by Labrador CMS