indsamling
Titartakkat 20.000 koruuninut - allallu
Titartaasartoq Robert Holmene aningaasanik amerlasuunik tunisisut ilagaat Facebook-gruppimi Henrik aamma Thora Tapersersukkit-mi kartersuiniartoqarmat. Katersorneqartut katillugit 106.616 koruuniupput. Robert Holmene-p tunniussai 20.908 koruniupput
"Asasakka Henrik & Thora
Titartakkakka katillugit 20.908,00 koruuninik isertitsissutaapput taakkulu tamarmik katersuiniarnermut kontumut ikineqarput. Aningaasat ataasiakkaat amerlanerpaat Grønlandsbankimi kontunnit nuunneqarput, pisisup ataatsip aningaasat toqqaannartumik ikivai killissaq nallertinnagu kingusinaaqqunagit. Pisisullu tallimat missaanniittut aningaasanik akiliipput takkulu toqqaannartumik BankNordik-imi, uannut ajornannginneruniassammat inussiarnisaarluni ikiuuttumut, katersuiniarnermut kontumut ikivakka."
Taamatut allappoq titartaasartoq Robert Holmene Facebook-gruppmi Henrik aamma Thora Tapersersoruk-mi, tassanilu ilaqutariinnut Brobergikkunnut, toqujartortitsillutik Danmarkimiittunut, katersuiniarnermi katersorsimasani saqqummiuppai.
– Titartakkat katillugit 30-40-t quiasaarusiallu ataasiakkaat tuniakka, Robert Holmene Sermitsiaq.AG-mut oqarpoq.
Kræftertumut Henrik Brobergimut, piffissaq kingulleq Sjællandip avannaani ilaquttani ikinngutinilu najorniarlugit kemo-mik katsorsartinnerminik unitsitsisumut, katersuiniarnermi tunitsivissaq kingulleq tassaavoq decembarip 6-at.
Novembarip qiteqqunnerani Nuunu aamma Mari Nissen Facebookimi gruppimik pilersitsipput, gruppilu sukkasuumik 1.000-it sinnilinnik taperserneqarpoq, tassanilu ataavartumik malinnaavigineqarsinnaasimavoq qanoq amerlatigisut isertinneqarsimanersut.
Katillugit 106.616 koruunit katersorneqarput, tamannalu Thora Brobergip nuannaarutigaa. Taanna allappoq:
– Inunnut, tupinnaannartumik suliniuteqarlutik Henrik aamma Thora-mik ikiuisunut, inunnullu8 oqaatsitigut, erinarsuutitigut, kaaginik, flødeboorlunik, nuersakkanik, siniffimmik, qullermik, nerrivimmik il.il. tapersersuisunut. Ilisimassavarsi Henrik uangalu inunnit iluanaarnersaasugut pissutigalugu inuit ilissitut ittut ilisarisimagatsigit! Suliniutigisimasasi tamaasa oqaasissaqartinngilavut.
Aamma atuaruk: Henrik kræftimik toqulerpoq: Ilaqutariit oqaluttuaat kilitsinnartoq
Aamma atuaruk: Robert Holmenep ilaqutariit Brobergikkut ikiorpai
Aamma atuaruk: Flødeboorlut 11.000 koruuninut.
Thora Broberg nangilluni allappoq tapersersoneqarnertik ilaatigut atorneqassasoq Henriup kusanartumik ilisaanissaanut.