Tipsit ilumuunngitsut: Danske Spilli Facebookimi pinerlunnianik mianersoqqusivoq

Facebookimi peqquserlulluni gruppiliarineqarsimasut ilaanni isikkammik arsaannermi eqqoriarneqarsinnaasut 'qularnanngitsut' tuniniarneqartarput. Spilkuponit uppernarsaasiullugit eqquinissamut qularnaatsuunerarlugit tuniniartarpaat.

Facebookimi quppernerit ilaanni 'Mr. Jackson - Elite Life' isikkammik arsaannermik eqqoriarneqarsinnaasunik pinnatassartaallu annertuujunerartarlugit sianiinaariniarsarisarpoq. Nittartakkatigut nutaarsiassaqartitsivik BetXpert taama allaaserinnippoq.

Aningaasanik tillinniarsarisartoq

- Qupperneq ilumuunngilaq inuilli aningaasaataannik tillinniarisartuuvoq. Ajuusaarnaqaaq, Danske Spillimi tusagassiuvinermut pisortaq, Marie Grabow Westergaardi, BetXpertimut oqarpoq.

'Mr. Jackson - Elite Life' 'eqqoriagassat qularnaatsut' 520 euronik akilersittarpai.

Facebookimilu gruppimi tuluit arsaattartuisa Sheffield Unitedip - Gillinghamip, Halifaxip - Salfordillu unamminissaannut paasissutissanik akiliisimagaanni Danske Spillimut spilkuponi ikkunneqarsimavoq oddsialu 494 eqqorneqarsimasinnaasoq aningaasanngorlugu 100.000 koruunit missarluinnaani pinnataarineqarsimasinnaasimallutik.

Kuponilu peqqusersulluni sanaajusimasoq, Danske Spillimiit uppernarsarneqarpoq

Ajornartorsiut alliartorpoq

Facebookimi Danske Spillip atia atornerlullugu spilkuponimik sanasoqarsimanera tusagassiuvinermut pisortap ajuusaarutigaa. Aatsaat taama pisoqarsimanngilaq.

- Ajornartorsiut tusakulavarput. Uatsinnut assut ajuusaarnarpoq, inuilli eqqarsarluartarnissaannik kaammaattuuteqarusuppugut. Taama ittunut aningaasanik atuitinnasi eqqarsarluaqqaarisi, Marie Grabow Westergaard, BetXpertimut oqarpoq.

Danske Spillip atia atornerlullugu sapaatip akunneranut arlaleriarlunin peqquserluttoqartarpoq. Eqqoriagassanik qularnaatsunik tuniniaanermi unammisitsinermullu attuumassuteqartunik Facebookimi Danske Spillip atia atorlugu gruppiliortoqartarpoq.

Facebookimut nalunaarutigisigit

Danskit statiata aningaasanoorutinik eqqoriaasitsisarfiutaata peqquserlullutik aningaasanik iluanaarniapilullutik qupperniliarineqartartut amerlavallaalermata misissugariunnaarsimavaat.

- Allatut iliorsinnaanngilagut, gruppiliarineqarsimasulli tamaasa Facebookimut nalunaarutigisarpagut, Marie Grabow Westergaardi, BetXpertimut taama oqarpoq.

Peqquserlullunilu gruppiliarineqartartut sivikitsuararsuarmik atorneqartarput. Iluarinningatimmi oqaaseqartartut amerlatsikkiartoraangata piiarnemullu angummanneq ajuleraangamik gruppit sanaatik matoriarlugit allanik nutaanik atserlugit gruppiliortarput.

Taamaammat politiinut nalunaaruteqaraluaraanni iluaqutaaneq ajorpoq.

- Piffissamik atuiffiginissaat pisariaqartinneqanngilaq inuimmi tamakku gruppiliortartut gruppiliatik matoriarlugit allanik nutaanik aallartitsisarmata, Marie Grabow Westergaardi taama oqarpoq kaammattuillunilu Facebookimi peqquserlunnianik takugaangamik ingerlaannaq Facebookimut nalunaarutiginnittaqullugit.

BetXpertip Facebookimi gruppimi piginnittoq ”Mr. Jackson - Elite Life" oqaaseqartinniarluaramikku iluatsissimanngilaat.