Atorfinititsineq

Tina Pars atorfittaarnermi kingorna: Piffissanngortoq

Ilisimatusarfimmi rektori Tine Pars Peqqissutsimut Naalakkersuisoqarfimmi pisortanngorpoq. Ukiut arfineq pingasut Ilisimatusarfimmi atorfeqareerluni nutaanik misileerusulersimanini Sermitsiaq.AG-mut oqaluttuaraa.

Tina Pars Peqqissutsimut Naalakkersuisoqarfimmi pisortanngorpoq.

Tine Pars 1. april 2017 aallarnerfigalugu naalakkersuisoqarfimmi pisortanngussaaq.

Tine Pars Ilisimatusarfimmi rektoritut ukiorpassuarni atorfiminni pisortatut sulinermik misilittagaqarpoq, suliassaanullu tunngatillugu ilinniarluarsimasuulluni. Ilaatigut Ph.D.-itut ilinniakkani aqqutigalugu Kalaallit Nunaanni peqqinnissap inooriaatsillu imminnut attuumassutaat ilisimatusaatigisimallugu. Naalakkersuisoq taama tusagassiuutinut nalunaaruteqarpoq.

Pisortatut sulinermik misilittagaqarpoq

Peqqissutsimut naalakkersuisup Agathe Fontainip naalakkersuisoqarfimmini pisortartaartik nuannaarutigaa.

- Tine Pars ukiorpassuarni pisortatut sulinermik misilittagaqarpoq Peqqissutsimut Naalakkersuisoqarfiup suliarisartagai pingaarnerit ilisimalluarlugit. Pineqartup suleqatigilluarnissaa qilanaarisorujussuuvara.

Peqqissutsimut Naalakkersuisoqarfimmi naalakkersuisoqarfiup pisortaatut atorfimmut qinnuteqartut arfineq pingasuupput.

Tine Parsillu atorfininnini Sermitsiaq.AG-mut ima oqaaseqarfigaa:

- Ilisimartusarfimmi atorfeqarnera nuannarisimaqaara. Unammillernartorpassuusimapput ukioq mannalu aallartittumi atorfeqarninnut isumaqatigiissuterput qaangiuppoq. Allanik misileerusulersimavunga. Peqqissutsimut Naalakkersuisoqarfimmi pisortassarsiulermata qinnuteqarsimavunga, 2009-mi Ilisimatusarfimmi rektoritut atorfinissimasoq Tine Pars taama oqaluttuarpoq.

Pisortatut sulinermik misilittagalik

- Pisortatut misilittagaqarluarpunga Naalakkersuisoqarfimmili pisortartut sulilernissara qilanaarivara, Tine Pars paasissutissiivoq. Peqqissutsimut Naalakkersuisoqarfimmi pisortassarsiortoqarnera pissutaalluni atorfimminit soraarniuteqarsimannginnerarpoq, ukiormi aallartittoq suliunnaarnissani aalajangiutereersimaneraramiuk.

- Naalakkersuisoqarfik sorliunersoq uannut apeqqutaavallaanngilaq. Unammilligassanik allanik misileerusunneq pingaaartinnerpaasimavara, Tine Pars taama nassuiaateqarpoq.

Atorfik inuttassarsinissaata tungaanut Prorektori Susanne Møller rektorinngorallassasoq Tine Parsip ilimagaa.

Tina Parsip atorfigisimasai

Tine Parsip Odense Universitetiani 1992-imi ilinniakkanik naammassereerlugu atorfigisarsimasai:

  • Ukioq ataaseq HR pisortaq KNI A/S, Sisimiut
  • Parere.gl namminersortutut ingerlassimasaa TV-kkut 50-sit sinnerlugit aallakaatitassiarineqarsimapput oqallisaarutinik paasititsiniaanermik, inuttaasut peqataasillugit, ilinniartitaaneq, ataatsimiinnernik aqutsisoq, sulianik aqutsisoq ilinniartitsinerlu.
  • Namminersornerullutik oqartussat nuna tamakkerlugu piujuaannartitsinissamik paasititsiniaaneranni Tulugami aqutsisoq.
  • Kvalitetschefi, Nuka A/S
  • PhD illersorlugu: SIF-ip Grønlandsskrifter nr. 11. København. Statens Institut for Folkesundhed, Kalaallit nerisassiaataasa Kitaaneersut atorneqarnerat.
  • PhD kandidatstipendiat, Københavns Universitet, Det Sundhedsvidenskabelige Fakultet
  • Ilisimatuutut suleqataaneq, Dansk Institut for Klinisk Epidemiologi, Afdeling for Grønlandsforskning.
  • Fuldmægtigi, Namminersornerullutik oqartussat, Peqqinnissamut, Avatagiisinut Ilisimatusarnermullu pisortaqarfik
  • Specialini illersorlugu: Nerisaqarnermut misissuineq – avannaani nunaqarfinni ingerlassimasaa: Saqqami Oqaatsumilu 1991-imi Odense Universitetiani.

Siulittaasunilu ilaasortaaffeqartarsimavoq. Juunip aallaqqaataani 2016-imi nalunaarsorneqarsimasut:

  • Siulersuisuni ilaasortaq, Grønlandsbankimi Inuussutissarsiornermut Aningaasaateqarfik
  • Ilaasortaq International advisory board for Institute for Circumpolar Health Research, Yellowknife, NT
  • Siulersuisuni ilaasortaq, Transparency International, Greenland
  • Kalaallit nakkutilliisuat Nordforsks siulersuisuini
  • Siulersuisuni ilaasortaq Avatangiisinut Aningaasaateqarfimmut
  • Siulersuisuni ilaasortaq Dudo and Poul Brandtip Aningaasaateqarfia
  • Ilaasortaq Aningaasaqarnermut Siunnersuisoqatigiit, Ilisimatusarfik sinnerlugu
Powered by Labrador CMS