Qaqortoq
Timmisartuussisakinnerulernissaq akerleralugu Kujataamiut akerliussutsimik takutitsipput
Kommune Kujallermi timmisartuussisarnerup annikillinissaanik ilimasaarineq naammaginagu tallimanngormat Qaqortormiut akerliussutsimik takutitsipput
Tallimanngormat ualikkut inuit 100-t missaanniittut Qaqortumi illoqannginnersami katersuupput Kujallermi timmisartuussisarnerup annikilliniarneqarneranut akerliussutsimik takutitsiniarlutik. Akerliussutsimik takutitsisut borgmesterip tullia Simon Simonsen siuttoralugu illoqarfikkoorlutik kommunip allaffianut ingerlaarput.
Kommunip allaffianut apuutereerlutik Simon Simonsen akerliussutsimik takutitseqataasunut oqalugiarpoq, oqaatigaalu kommunip pakatsissutigigaa isumaqatigiinniarnernut peqataaqqusaasimannginnamik. Akerliussutsimik takutitsisunit eqqumiitsutut tikkuarneqarpoq isumaqatigiinniarnerit taama kingusitsigisukkut aallartissimammata, ilisimaneqareersoq sullissinissamik isumaqatigiissutit isumaqatigiinniutigeqqinneqartussaasut. Tamanna innuttaasunit eqqissisimanngitsitseqaaq ernumanartoqartinneqarlunilu.
Mittarfeqarfiit tallimanngormat nalunaarput isumaqatigiinniarnerit qanorluunniit ingerlagaluarpata Kujataani heliportit tamarmik ingerlanneqarnerat ingerlaannassasoq.
Assit ataani takukkit