silarluppoq
Timmisartuussinissat amerlanersaat maannamuugallartoq unitsinneqarput
Sila Air Greenlandimut suli ajornartorsiortitsivoq. Timmisartorsuaq Danmarkiliartoq aamma Keflavikiliaannarpoq anorlerpallaarnera pissutigalugu
Soorlu aamma ataasinngornermi, sila marlunngornermi timmisartorfigineqarsinnaanngilaq.
Sinerissami illoqarfiit arlallit siallerlutillu sakkortuumik anorlerput, taamaattumik ataasinngornermi timmisartuussinissaagaluit marlunngornermut nuutsinneqarput.
Nuummi suli anorlerpoq, maannakkulli apilluni.
Air Greenlandimi attaveqaqatigiinnermut ataqatigiissaarisua Katrine Hjelholt Nathanielsen Sermitsiaq.AG-mut nalunaaqutaq 10.15 ima ilisimatitsivoq:
- Timmisartuussinissat amerlanersaat maannamuugallartoq unitsinneqarput, nalunaaqutaq 12.30 annertunerusumik paasisaqartoqassalluni. Nuummi silarlunnera pissutigalugu timmisartuussinerit arlaqartut unitsinneqarput. Kitaani aamma sila unerisimanngilaq. Soorlu Kangerlussuarmi ilaasut ingerlariaqqittussat 200-t uninngagallarput.
Danmarkiliartaat utiinnartoq
- Timmisartorsuaq danmarkiliartoq aamma Keflavikiliaannarpoq, qutsissumi anorlerpallaarnera pissutigalugu. Taanna pillugu paasissutissiisoqassaaq nunatsinni nalunaaqutaq malillugu nalunaaqutaq 13.00, Katrine Hjelholt Nathanielsen ilisimatitsivoq.
Ilaasussat Tekst Tv-ikkut aamma Air Greenlandip nittartagaatigut malinnaasinnaapput. Ilaasussat mobiliisa normui Air Greenlandimit ilisimaneqartut allannguutinik smsikkut nassinneqartassapput.