Flytrafik
Timmisartuussineq: Unammillertoqarnissaa Inatsisartut piumasaraat
Air Greenland eqaannerusariaqarpoq - taamaanngippat suliffeqarfiit allat timmisartuussisariaqarput, Inatsisartut sanaartornermut ataatsimiititaliaat taama isumaqarpoq
Air Greenlandip illoqarfinnik akunnattumik angissusilinnik isorliunerusunillu timmisartuussinera Inatsisartut isornartorsiorpaat. Isornartorsiuineq marlunngornermi ualikkut Inatsisartut oqaluttarfiannit saqqummiunneqarpoq kujataani timmisartuussinerup oqallisigineqarnerani.
Oqaluuserineqartoq tassaavoq Narsarsuup Islandimilu Keflavikip akornanni timmisartuussinnerup amigartoorfiusinnaaneranut matussusiinissamik qularnaveeqqusiinissaq. Siunnersuut itigartinneqarpoq, sanaartornermulli ataatsimiititaliap isumaliutissiissummik saqqummiussinermini Air Greenlandip illoqarfinnik akunnattumik angissusilinnik isorliunerusunillu timmisartuussinera isornartorsiorneqarpoq.
- Ataatsimiititaliap isumaqatigiittup piumasaraa Air Greenland Naalakkersuisunit piumaffigineqassasoq ukiuni tulliuttuni ullumikkornit eqaannerusumik timmisartuussisarnissamik pilersaarummik suliaqassasoq. Ataatsimiititaliap kaammattuutigaa pilersaarut pineqartoq ullumikkut angallannikkut akinik atuuttunik qaffaanermik kinguneqanngitsumik suliarineqassasoq, Inatsisartut sanaartornermut ataatsimiititaliaat nalunaarpoq.
Mittarfiit nutaat
Kujataani qulimiguulimmik timmisartuussineq kinguaattoorfiullataasuuvoq. Taamatullu aamma ipput timmisartuussiviit qulimiguullit atorlugit timmisartuussiffigineqartut taakku kinguaattorfiullutillu taamaatitsinernik nalaataqarfiullattaasuummata.
- Air Greenland eqaannerusumik angallassinissamik piumassuseqanngippat timmisartuutileqatigiiffiit allat ammaanneqarnissaat ataatsimiititaliap kissaatigaa, sanaartornermut ataatsimiititaliaq, Nunatsinni timmisartuussinermi unammillertoqalernissaanut inassuteqarluni allappoq.
Sanaartornermut ataatsimiititaliap isumaliutissiissutaa talerpiatungaani linki toorlugu aasinnaavat