annaassineq
Pisulluni angalaartoq maqaasineqartoq timmisartup nassaaraa
Kangerlussuup aamma Sisimiut akornanni aqqummi pisulluni angalaartoq maqaasineqartoq sakkutuut timmisartuanit Challengerimit nassaarineqarpoq.
Marlunngornermi ullaap tungaani Kalaallit Nunaanni Politiit Kangerlussuarmit Sisimiunut pisuttunit marlunnit nalunaarfigineqarlutik sianerfigineqarput. Pingajorisartik tammartoq taakku ilisimatitsissutigaat.
Issittumi Sakkutooqarfik Facebookimi quppernermini taama ilisimatitsivoq.
Pisullutik angalaartut pingasut taakku Innajuattup tasiata eqqaani illuaqqami unnuisimapput, tassanngaanniillu pisullutik ingerlaqqillutik.
Inuit pingajuat aqqummi ingerlaarfimmit tammarsimasoq piffissap ingerlanerani pisuttut marluk paasilerpaat. Taanna ujaraluarpaat, kisianni akunnerit marluk ujaasillutik iluatsitsinnginnamik politiinut attaveqarniarlutik aalajangerput.
Kalaallit Nunaanni Politiit tassanngaanniik Issittumi Sakkutooqarfik ujaasinermut ikiuunnissaanik qinnuigaat.
Qulimiguulik S-61 Kangerlussuarmit ingerlaannaq aallartinneqarpoq. Qulimiguullip pisuttut marluk ikivaat, pisuttorlu maqaasineqartoq ujarlugu aallaqqipput.
Timmisartup Challengerip inuk maqaasineqartoq sumiiffimmi takuaa, sumiiffialu qulimiguulimmut nalunaarutigaa, taannalu tassunga timmivoq.
Inuk maqaasineqartoq ajunngitsoq paasineqarpoq, taakkulu Sisimiunut pisunnertik nangissinnaanngorpaat.