Timmisartup attartorneqartup ajutoornikuusimanera Gert Braskimit tupaallaatigineqarpoq

Greenland Express Airip nalunaarutigisaattut suliassat piffissami naammassineqarsinnaassappata, timmisartuutileqatigiiffik juunip aappaanit ilaasoqarluni timmisartuussisalissaaq.

Gert Brask Sermitsiaq.AG-mit pingasunngornermi apersorneqarnermini taama naqissusiivoq.

Timmisartoq hollandiminngaanneersunit Denim Airimit attartorneqartoq Fokker F-100 septembarip 19-ani 2009-mi minnermini ajutoorsimasoq CHECK-IN.dk sisamanngornermi nalunaarpoq.

Tysklandimi Stuttgartip mittarfiani naqqarmilluni mittarfimmut mippoq. Ajutoornerani timmisartuutileqatigiiffimmit Contact Airimit timmisartoq pigineqarpoq Lufhansamullu angallassisarluni. Timmisartup siuatigut mippoq 1.000 meterinillu sisoorluni. Ajutoornerminit qaammatit marluk qaangiuttut atorneqaqqilerpoq, novembarip 11-ni 2009-mi angallasseqqittalerluni.

Ajutoornermi 78-it ilaasorineqarput, pingasut annikinnerusumik ajoqquserlutik, tallimallu tupannerminnut ikiorserneqarlutik.

Timmisartup oqaluttuassartaa ilisimanngikkaat
Timmisartoq Fokker-100 Greenland Express Airip ukiuni tulliuttuni pingasuni attartortussaavaa, ajutoorsimaneralu Gert Braskip paasimmagu tupassimasoq CHECK-IN.dk allappoq.

- Ajutoorsimanera ippassaq unnukkut (marlunngornermat) paasivara, neriuutigisimagaluarparalu Denim Airip tamanna pillugu ilisimatitsisimassagaluartoq. Timmisartumi aquttartup nalunngisamma timmisartoq attartugarput misissorpaa, uannullu qanoq pisoqarsimaneranik ilisimatitsissutigalugu, Gert Brask CHECH-IN.dk-mut oqarpoq.

Denim Airip aamma timmisartoq ajutoorsimaneranik ilisimasaqarsimanngilaq.

- Timmisartoq Stuttgartimi ajutoorsimasoq ilisimasaqarfiginngilarput. Pingaarnerpaajuvorli timmisartoq iluarsarneqareermat maannakkullu ilaasoqarluni angallassisinnaalluni. Ajoqquteqarsimasuuppat pigisimanavianngikkaluarparput. Lufthansa amerlasuunik sukangasunik inatsiseqarput, Denim Airimi pisortaaneq Ronald Janssen CHECK-IN.dk-mut oqarpoq.

Timmisartoq Fokker-100 Stuttgartimi ajutoornera qulaani videomi takuneqarsinnaavoq. Timmisartoq Greenland Express Airip timmisartuutileqatigiiffimmit Denim Airimit attartorpaa