timmisartup ajutoornera
Timmisartup ajutoornera: Paasiniaaneq sivisussaaq
Ilulissat mittarfiat silaannakkut angallannermut naliginnaasumut ammaqqippoq. Timmisartut ajutoornerit paasiniaasartut sisamanngornermi tikissapput
Air Greenlandip timmisartua Dash 8 pingasunngornermi ullaakkut Ilulissanut minnermini mittarfiup sinaanut sisoorpoq. Timmisartoq mittarfiup sinaatigut ammut sisoreerluni unippoq. Oqartussaasut ajutoornermut pissutaasoq suli nalunaarutigisinnaanngilaat.
Air Greenlandip timmisartua gl 3205 kinguaattuulaarpoq Ilulissani anorlernera pissutigalugu.
- Kisianni nalilersimavarput minninnissaq isumannaatsumik pisinnaalluartoq. Maannakkulli oqaatigisinnaanngilarput timmisartup ajutoorneranut suna pissutaanersoq, Air Greenlandip aningaasarsiornermut pisortaa Christian Kjeldsen Air Greenlandip pingasunngornermi ualikkut tusagassiortunik katersortitsinerani oqarpoq.
Misissuineq sivisooq
Timmisartut ajutoornerinik misissuisartut Ilulissanut sisamanngornermi tikissapput ajutoorneq misissoriartorlugu.
- Timmisartut ajutoornerinik misissuisartut nalunaarusiaagallartumik ullut 30-it ingerlaneranni saqqummiussaqartarput. Inaarutaasumilli nalunaarusiaq qanittumi naammassinavianngilaq. Assersuutigalugu Air Icelandip timmisartuata Nuup mittarfiani ajutoorneranit ukiut marluk qaangiuttut aatsaat inaarutaasumik nalunaarut piareerpoq, Mittarfeqarfinni pisortaq Niels Grosen oqarpoq.
Mittarfimmi ajutoorfimmi suliat Ilulissani politiit maanna aquppaat.
- Misissuineq timmisartut ajutoornerinik misissuisartut sisamanngornermiit aqutarilissavaat, Nunatsinni politimesteri Bjørn Tegner Bay oqarpoq.
Pingasunngornermi ualikkut Ilulissat mittarfiat naliginnaasumik ingerlaqqilerpoq.