ujaasineq

Timmisartuaraq nassaarineqarpoq aquttua ajunaarsimasoq

Kulusuup mittarfiata eqqaani timmisartuaraq ujaarineqartoq pingasunngornerup ualinerani nassaarineqarpoq. Timmisartuaraq septembarip aqqarnganili ujaarineqartoq taamaasilluni nassaarineqarpoq

Air Greenlandip qulimiguua Bell 212 angallassitilluni timmisartuaraq ujaarineqartoq nassaaraa pingasunngornerup ualinerani

Timmisartuaraq ullut arfineq marluk ujaarineqareerluni nassaarineqarpoq. Kulusuup mittarfiata eqqaani pingasunngornermi nassaarineqarpoq.

Naviairip tusagassiutinut ataqatigiissaarisuata Camilla Hegnsborgip tamanna Sermitsiaq.AGmut uppernarsarpaa.

- Air Greenlandip qulimiguua Bell 212 angallassitilluni timmisartuaraq nassaaraa pingasunngornerup ualinerani. Timmisartuaqqami aquttoq ajunaarsimasoq aamma nassaarineqarpoq - timmisartortartoq amerikarmiuuvoq tusagassiuutini eqqartorneqartoq. Timmisartortartup ilaqutai nalunaarfigineqareerput, Camilla Hegnsborg oqaluttuarpoq.

- Timmisartuaraq Kulusuup mittarfiata eqqaani nassaarineqarpoq. Timmisartuara Kulusuup mittarfianut septembarip aqqarngani mittussaagaluarpoq. Timmisartuaqqap nassaarineqarfiata nalaani ujaasisoqarnikuugaluarpoq - sila peqqutaagunarluni nassaarineqarnani, Camilla Hegnsborg oqarpoq.

Amerikami tusagassiuutit ilaata The Forum of Fargo-p allaaseraa 34-nik ukioqartoq Paul Eriksmoen timmisartuaqqami aquttuusoq. Paul Eriksmoen naalagaaffeqatigiinni Washingtonimeersoq illoqarfimmi Sheltonimeersuulluni.

Timmisarsuaraq DA40 Islandimit Keflavikimit Kulusummut mikkiartornerani attaveeruppoq nalunaaquttap 14.00-ip missaani septembarip aqqarngani.

Powered by Labrador CMS