maleruaqqusat
Timmisartuaqqanik ungasianiit aquttakkanik atuisinnaanermik ilinniartitsineq
Timmisartuaqqanik ungasianiit aquttakkanik atuinermut malittarisassat juulip aallaqqaataanni atuutilersunik sukateriffigineqarput. Timmisartuaqqanik ungasianiit aquttakkanik ingerlatsisartut immikkut ilisimasallit suliffeqarfinnut kikkunnullu tamanut timmisartuaqqanik ungasianiit aquttakkanik ingerlatsisinnaanermik pikkorissaanermik maanna neqerooruteqarput, tamatumunnga ilaatinneqarlutik malittarisassat aamma najoqqutassat
Mads Petersen Dronepilot.gl-imi pisortaasoq aamma Anders Berthelsen suliffeqarfimmik Made in Nuuk-mik piginnittuusoq ataatsimoorlutik immikkut ilisimasalittut timmisartuaqqanik ungasianiit aquttakkanik sammisaqarsinnaanermik aamma ilinniartitsinermik neqerooruteqarput.
Taakku marluullutik timmisartuaqqanik ungasianiit aquttakkanik 7 kiilut angullugit oqimaassusilinnut ingerlatsisinnaanermut atuuttumik kategori 1B-mik allagartaqarput. Tamatuma saniatigut illoqarfiup iluani qanittuanilu ingerlatsisinnaanermut Angallannermut Qullersaqarfimmit akuersissutaateqarput.
Taakku Nuummi qanittukkut tallimariarlutik pikkorissartitsipput, peqataasut tamarmik tassa sunngiffimminni ingerlatsisartut aamma Nukissiorfinneersut aamma Qatserisartuneersut teknikimut tunngasunik, malittarisassanik aamma timmisartuaqqanik ungasianiit aquttakkaniit pitsaanerpaanik qanoq assiliisoqarsinnaanera ilinniartitsissutigineqartarlutik.
– Suliffeqarfiit amerliartuinnartut timmisartuaqqat ungasianiit aquttakkat suliassanut assigiinngitsorpassuarnut qanoq atorneqarsinnaanersut paasiartulerpaat. Soorlu Nukissiorfinni sulisunut timmisartuaqqat ungasianiit aquttakkat atorlugit ruujorinik erngup aamma kiassaateqarfiit aqqutaannik qanoq misissuisoqarsinnaaneranik pikkorissaavugut. Aamma KNR-imi sulisunik filmiliortartunillu, timmisartuaqqanik ungasianiit aquttakkanik atuilluni qanoq assiliisoqarsinnaaneranik filmiliortoqarsinnaaneranillu ilinniartitsivugut, Mads Petersen oqaluttuarpoq.
Allaaserisaq Sermitsiaq aviisip immikkut ilanngutaani Motoorimi atuaruk. Aviisi uani pisiariuk: