Timmisartorsuup teknikkikkut ajornartorsiuteqarnerani ilaasut 850-it kinguaattoortinneqarput

Air Greenlansdip timmisartorsua Norsaq teknikkikkut ajoquteqarnini pissutigalugu angalanissaralua ullup aappassaannik taamaatiinnarneqarpoq. Timmisartortitseqatigiiffik kingorna arlalinnik unammilligassaqarpoq.

Ulluni makkunani timmisartortitseqatigiiffik Air Greenland arlalinnik unammilligassaqarpoq.

Timmisartorsuaq Norsaq sisamanngornermi Københavnimit aallannginnermini teknikkikkut ajornartorsiulerpoq, tamatumalu aamma ullumi tallimanngornermi Københavnimit aallarnissaraluaq taamaatitsippaa.

- Ilaasut katillugit 850-it taamaatitsinernit kinguartitsinernillu eqqorneqarput.

Attaveqaqatigiinnikkut ajornartorsiorneq

Air Greenland kisianni attaveqaqatigiinniarnikkut annertunerusumik unammilligassaqarpoq.

- Sullitatsinnut attaveqaqateqarnermut attaveqaatit atorsinnaannginnerat unammilligassani annerpaavoq. Angalanissanut pilersaarutinut iluarsiissutit pillugit SMS-it anngutinngitsoorput, skærmini nutarterinerit ersinngitsoorput aammalu Københavnimi, Kangerlussuarmi Nuummilu paasissutissiissutit nutartinngitsoorput imaluunniit naammanngitsoorlutik. Atorsinnaannginnerat ajuusaarnartorujussuuvoq akuersaarneqarsinnaananilu. Sullitanit kipiluttunartorsiortunit amerlasuunit saaffigineqarpugut, tamannalu pissusissamisoorluinnarpoq, attaveqaqatigiinnermut pisortaq, Katrine Hjelholt Nathanielsen, tusagassiuutinut nalunaarummi oqarpoq.

Atuaruk: Timmisartorsuaq ullup aappassaannik taamaatiinnarneqartoq

Kingoraartissaq ajoqutilik

Sisamanngormat unnukkut Norsaq-mi pisarnertut misissuinermi teknikkikkut ajutoornermik nassaartoqarpoq.

- Niuerfimmi timmisartumik allamik, ullormi tassani ilaasunik timmisartuussisinnaasumik attartornissamut periarfissanik misissuisoqaraluarpoq, kisiannili ingerlatseqatigiiffiit arlaannaalluunniit atugassiisinnaasimanngilaq. Taamaattumik ilaasut sisamanngornermi unnukkut nal. 20.00 timmisartuunneqarnissaat pilersaarutigineraluarpoq. Ajoraluartumik kingoraartissaq timmisartumik tikisinneqartoq ajoquteqarpoq, taamaattumillu Norsaq ipassaq piariinngitsoorpoq. Kingoraartissamik nutaamik tikisitsinissaq ajornakusoormammat, aatsaat Norsaq arfininngorpat ingerlaqqinnissaminut piariissaaq, tamanna nalunaarutigineqarpoq.

Ullumi tallimanngornermi Jettimep ataasiinnarmik aallartitsinissaa, taamaalillunilu llumi ilaasussat ilaasa apuunneqarnissaat pilersaarutigineqaraluarpoq. Aallartussarli taanna ilaasut ikereerneranni taamaatinneqarpoq, pilotinut piffissarititaasut naannginnerini timmisartup piareersarneqarnissaa angumerineqarsinnaasimanngimmat, timmisartortitseqatigiiffik ilisimatitsivoq.

Tallimanngornermut arfininngornermullu pilersaarutit

- Tomas Cookimiit timmisartumik attartornissaq iluatsinneqarpoq, taannalu ullumi Manchesterimiit Kangerlussuarmut timmissaaq, sisamanngornermi ilaasussat tallimanngornermilu ilaasussat ilaat Københavnimut apuutissallugit.

Norsaq aqagu arfininngornermi piariissasoq, Air Greenlandimit neriorsuutigineqarpoq.

- Nuummiit timmisartuussinissat marluk taamaatinneqarput, Kangerlussuarmi ilaasut isumagineqartussat amerlinissaannut inissaqartitsisoqanngimmat. Aqagu arfininngornermi ullup qeqqata missaani Norsaq piariissasoq nalunaarutigineqarpoq, taassumalu saniatigut Jettimemiit timmisartumik attartortoqarpoq, aammalu arfininngornermi nunap iluani timmisartuussinissat naleqqussarneqarput, taamaalilluni ilaasut tamangajammik apuunneqarsinnaassammata, Air Greenland taama nalunaaruteqarpoq.

Powered by Labrador CMS