Timmisartorsuarnut Ilulissani mittarfeqalernissaa sulissutigineqartoq

Ilulissani timmisartorujussuarnut mittarfiliornissamut aningaasaliisussanik Qaasuitsup Kommunia oqaloqateqarpoq. Qaasuitsup Kommuniata borgmesteria oqarpoq nunatta karsia tassunga akiliuteqassanngitsoq, Inatsisartut Naalakkersuisullu kisianni mittarfiup allilerneqarnera piviusunngussappat akuerseqqaartussaapput.

Qaqortumi mittarfiliortoqarnissaanut aningaasanut inatsimmi 2015-moortumi 371 million koruunit aningaasartuutigineqassapput. Ilulissani Nuummilu mittarfiit allilerneqarnissaat aamma pilersaarutigineqarpoq. Aalajangiisoqannginnissaani annertusisamik misissuisoqassaaq. Pilersaarutit pissusissamissut ingerlaannassappata Ilulissani mittarfimmik piginnittut allanngussapput.

- Timmisartorujussuarnut mittarfiliortoqassappat misissuisoqartariaqartoq kommunalbestyrelsimi 2013-mi aalajangiisoqarpoq. Ilulissani mittarfiup allilerneqarnissaanut aningaasaleerusuttunik oqaloqatiginnippugut, Qaasuitsup Kommuniani borgmesteri Ole Dorph Sermitsiaq.AG-imut oqarpoq.

Aningaasaliiumasoqartoq
Timmisartoqarfik 2.800 meteriusussaassasoq pilersaarutigineqarpoq, taamaasilluni Air Greenlandip timmisartuatut Norsatut ittut missinnaalissallutik. Timmisartoqarfik Kangerluarsuup tungaanut killeqassasoq oqaatigineqarpoq, tassani aamma umiarsuarujussuit talittarfittaarnissaannik aamma sulissuteqartumik.

- Naalakkersuisut Inatsisartullu una pillugu aalajangiinissaat utaqqiinnarparput. Aalajangiisoqariarpat aningaasaliiniartut piareeqqapput. Nunatta karsianut aningaasanik aallertoqartariaqanngilarmi, Ole Dorph oqarpoq.

Timmisartoqarfik inuussutissarsiornikkut sulinerit ammaaffigineqassapput.

- Siunissami timmisartorujussuit missinnaalissappata takornarissat aamma umiarsuarmik ilaasut Ilulissani talittarfittaarnissaat ammaanneqassaaq. Mittarfik allilerneqassappat Ilulissani hotellinik amerlanerusunik sanasoqartussaavoq aamma, Ole Dorph oqarpoq.

Ilulissani mittarfiup sananeqarnera 800 million koruuninik akeqassangatinneqarpoq.