Fly
Timmisartorsuaq Nunarput qulaallugu timmisoq motoorimigut ajornartorsiortoq
Los Angelesimiit Stockholmimut Atlantiku qulaallugu inunnik 300 missaanniittunik timmisartuussisoq, Kalaallit Nunaat qulaallugu timminermini ajornartorsiulerpoq.
Timmisartumi Norwegian Boeing 787-8 Dreamlinerimi motoorip aappaa teknikkikkut ajutoorpoq, timmisartortartullu 11.887 meterisut qutsitsigisumiillutik timmisartup motooriata aappaa qamittariaqarsimavaat, Keflavik International Airportillu tungaanut aallarlutik, nittartakkakkut tusagassiorfik Check-In taama allappoq.
Timmisartup qutsissusaa appartinneqapallattoq
Timmisartorluni ajornartoorneq sapaatiummat pivoq.
Timmisartup motooria Keflavikkip mittarfianit avannamut kitaani 925 kilometerisut ungasitsigisumi qaminneqarmat, qutsissussaa ingerlaannaq 7.315-imut apparneqarpoq.
Timmisartoq ajornartorsiortoq Islandimut isumannaatsumik mippoq. Ilaasut timmisartumut allamut ilaallutik Stocholmimut ingerlaqqittariaqarsimapput, akunnernillu 11,5-nik kinguaattoorsimallutik, Check-In ilisimatitsivoq.
Aappassaa motoorimik ajornartorsiortoq
Piffissap sivikitsup iluani timmisartoq taannarpiaq timmisartuussinermini ajornartorsiorpoq. Juunip 11-anni timmisartoq Parisimit New Yorkimut ingerlaarnerani Irlandip kitaani 740 kilometerit missaanni ungasissusilimmiilluni motoorip aappaa qaminneqartariaqarsimavoq, Shannonimilu milluni.