timmisartorneq

Timmisartoq ajornartoornermi Kangerlussuarmut mittariaqartoq

Canadamiut timmisartorsuannut ajornartoornermi mittariaqalersumut ilaasut 250-iupput

Timmisartoq Boeing 737 Westjet

Canadamiut timmisartorsuat Londonimit Torontomut ingerlaartoq Kangerlussuarmut ingerlateqqinneqartariaqarsimavoq. Canadamiut nittartakkakkut nutaarsiassaqartitsiviat Global News taama allappoq.

Timmissartortitsiviup Westjetip timmisartuutaani Boeing 767-imi ilaasut 250-iupput inuttallu qulingiluaallutik. Mekanikkikkut ajoquteqarneq pissutaalluni timmisartoq Kangerlussuarmut mittariaqarsimavoq.

Ajornartorsiunngitsut
- Minniarneq ajornartorsiuteqanngitsumik pivoq, Westjetip oqaaseqartartua Robert Palmer, Global Newsimut taama oqarpoq.

Westjetip ilaasut Torontomut apuunniarlugit timmisartunik marlunnik aggertitsivoq.

CBC News naapertorlugu timmisartoq akunnerni tallimani silaannarmeereerluni mittariaqalersimavoq. Tusagassiorfiullu oqaaseqartartoq issuarpaa, timmisartumi kiassutsip aqunniarneqarnerata ajornartorsiutaanera pissutaalluni mittariaqarnermik aalajangiisoqarsimasoq.

Ajornartoornermi mittoqarneranut atatillugu mittarfiup upalungaarsimasui mittarfimmi piareersimapput.

Pissanganartorsiortoqanngitsoq
Ajornartoornermi mittoqartariaqarsimasoq Kalaallit Nunaanni Politiit uppernarsarpaat.

- Pissanganartorsiornertaqanngitsumik tamanna pivoq. Ajoqusertoqanngilaq, timmisartortitseqatigiiffiup ilaasut pineqartut isumagivaat, Mads Christensen, Nuummi politiineersoq ilisimatitsivoq.

Powered by Labrador CMS