jubilæum
Timmiarniaq Namminersorlutik Oqartussanut
Emanuel-ip qalipagaanik namminersorlutik oqartussanut tunniussaqaqqippoq
Roar Christiansenip pingasunngormat Katuami Nuummi ukiuni 40-ni namminersortutut ingerlatsisimanini malunnartippaa namminersorlutik oqartussanut Emanuel Petersenip qalipagaanik tunissuteqarluni.
Naalakkersuisunut ilaasortap Martha Lund Olsenip namminersorlutik oqartussat sinnerlugit qalipagaq tiguvaa.
Qalipagaq tassaavoq Uummannami timmiarniartoq, sorsunnersuaq sioqqullugu qalipanneqarsimasoq, 115 cm-inillu silissuseqarpoq 140 cm-inillu portussuseqarluni. Piumaneqarnera tuniniaavimmilu pissutsit apeqqutaallutik qalipagaq nalilerneqarpoq 60.000 koruuninik naleqartoq.
Aalut Kangermiu
1998-imi Roar Christiansen ukiunik 25-inngortorsiorluni nalliuttorsiormat Namminersornerullutik Oqartussat aamma Emanuel-ip qalipagaanik tunissutisipput, qalipagarlu tassaavoq umiarsuup Gertrud Rask-ip Tasiilamut tikinnera. Taanna ullumikkut Hans Egedep Illuani nivingavoq.
Ilassinninnermi peqataasut 70-it missaanniittut Roar Christiansenip 1973-imi aallartinnerminik oqaluttuuppai, taamanikkunniillu Nuummi ingerlatsivimmik namminersortumik ingerlatsineq qanoq innersoq. Oqaluttuaaqqanik takussutissalerlugit.
– Glarmester-iuneq akkannit ilinniarpara, Nordre Fasanvej-imi Smallegadep Peter Bangsvejillu eqqannguanni pisiniarfiutilimmit. Kangilinnguani sakkutuujullunga sakkutuut naalagaasa nuliaat assit sinissaannik sanaattarpakka, taamaattumik isumaqarsimavunga suliassaq sapissanagu 1973-imi aallartikkama, tamannalumi eqqorpoq, taanna oqarpoq.
Taavalu oqaluttuaraa arlanni nuliaminut Regine Thaarup Høeghimut (taamanikkut borgmesteriusup paniisa angajullersaannut) suliassaqarpallaannginnini maalaarutigigamiuk.
– Aqaguani Aalup Kangermiup titartagai 35-t takkuppai. Atuarfimmi suleqataata assit sinissaannik immikkut ittunik sinilerusussimavai, taakkualu Danmarkimit piniaqqaartussaavakka. Oqaluttuarpunga akisussaqisoq. Soqutaasimanngilarli qanoq akeqarnissaat, suliarineqaannassapput. Qaammat sinnerlugu qaangiuttoq sinissat takkupput. Sapaatip akunnerani tullermi tamarmik naammassipput. Regine atuarfimmit angerlarmat oqarfigaaga suleqanni nalunaarfigisinnaagaa aasinnaagai, 7.500 koruuninillu akeqartut. Taava qungatsinnut pissiffigaanga oqarlunilu "asasara qujanarsuaq, uagut pissavut, nalunngilluarparalu sumi nivingassasut". Silattuallaatigeqaara qungujulaajutigiinnarparali. Ilikkarpara nuliaq oqarfigineqanngisaannassasoq suliassaqarani, Roar Christiansen oqarpoq.