inuusuttunut suliniut
Timi Asimi ingerlaannarniarluni misiliisoq
Kommunip inuusuttunut suliniut Timi Asimi ukiut marluk matuma siorna tapersersorunnaarpaa tapiissutillu unitsillugit, maannali allaanerusumik periaaseqarlutik kommunimit eqqumaffigineqarnissamik anguniagaqalerlutik
Inuusuttunut suliniut Timi Asimi, inuusuttunik inooqatigiinnikkut misigissutsitigullu annertuumik ajornartorsiuteqartunik, atuarfinnilu iliuusissatut periarfissanik tamanik misileraasoqareeraangalluunniit ineriartoqqissinnaasutut nalilerneqartartunik, ikiuiniarnissamik siunertaqarpoq.
Qaammatini sisamani in- gerlanneqartarpoq, aasaaneralu asimiinnerunermut atorneqartarluni, piffissallu sinnera inini illoqarfimmi attartorneqartuni atorneqartarluni.
Kim Godtfredsen, Timi Asimimik isumassarsisuusoq, inuusuttunik inuunerminni ingerlariaqqinnissamut ikiuiniarnermini angusarissaarluarsimavoq, inuusuttut aaqqissuussinermik naammassinnittarsimasut amerlassusaat eqqarsaatigissagaanni.
Kisianni Timi Asimi Kommuneqarfik Sermersuumi politikkikkut tapersersorneqannginnini pissutigalugu ukioq manna pikkorissartunik aallartitsisimanngilaq.
- Timi Asimi 2011-mi aallartimmalli peqataasut tamangajalluinnarmik inuunerminni ingerlariaqqissimapput. Timi Asimip ukiuni taakkunani atuunnerani inuusuttut 145-t suliniummik naammassinnissimapput, Kim Godtfredsen oqarpoq.
Timi Asimip maanna paasiniarnialerpaa aviisini assigiinngitsuni, maannamuugallartoq Nuuk Ugeavisimi, Tamanut Avannaanimi aamma Tamanut Kujataanimi, ussassaarutinik ilanngussaqaruni saaffiginnissutit qanoq amerlatigisut pissarsiarineqarumaarnerat.
-Tapiissutinik pissarsiniarluta Sermersuumut saaffiginnikkatta pingaakujuppaluttumik akineqaannarpugut. Oqarput namminneq inuusuttunik sullissiniarlutik uagullu arlaannik pisariaqartitsigutta nammi- neerluta sulisariaqartugut. Allatut oqaatigalugu atorfissaqartinngilaatigut. Kisianni akerlilerusuppavut inuusuttut qanoq amerlatigisut meeqqat atuarfiannit ingerlariaqqinngitsoortarnerannut kisitsisinik piviusunik takutitsiviginerisigut, Kim Godtfredsen oqarpoq.
Inuusuttut 145-t missaanniittut Timi Asimimut 2011-mi aallartimmalli peqataasimpput. Kim Godtfredsenip kommunip suliniutinut aningaasaliiffigineqarnissamik qinnuteqaatinik suliarinnikkaangami qanoq nalilersuisarnera imaluunniit piumasaqaatinik sunik tunngaveqartarnera ilisimanngilaa.
- Inuusuttut qanoq amerlatigisut Timi Asimimut peqataarusunnerat paasigutsigu kommunimut saaffiginneqqissaagut takutillugillu inuusuttunut inuunerminni ingerlariaqqissinnaanngitsunut meeqqallu atuarfiata kingorna suliffissaaleqisunut ilaalersimasunut pikkorissaarnermik pisariaqartitsisoqartoq. Qinnuteqartut tamarmik amerlassusaat aqqilu takutinniarpavut suleriaatsitsinnillu atuiumanissaat neriuutigalugu, oqarpoq.
Timi Asimi inuusuttut qanoq amerlatigisut Timi Asimip suliniutaanut peqataarusunnerannik allattorsimaffiuteqanngilaq, Timi Asimimut utaqqisunut allattorsimaffiliorneq imaluunniit qinnuteqaammik immersugassamik suliaqartannginnamik.
- Nalunngilarput inuusuttorpassuit Timi Asimimut peqataarusuttut. Nutaanik aallartitsileraangatta peqataasimasut attaveqarfigisarpavut, taakkualu inuusuttunik peqataarusuttunik nassaarniarnitsinni ikiortarpaatigut. Peqataarusuttorpassuarnit tassuu- guinnaq saaffigineqartarpugut. Inuusuttunik peqataarusuttunik pissarsiorluta ussassaaruteqarsimanngisaannarpugut, taamaattumik qanoq amerlatigisunik saaffiginnittoqarnissaa pissanngatigilaarparput.
Timi Asimi ukioq manna pikkorissaanngilaq, kisiannili aningaasaliisutik illoqarfimmi suliffeqarfiit angisuut ilaat peqatigalugit anngikitsunik suliaqartarsimallutik.
Inuusuttunik peqataasimasunik ilaatigut illoqarfimmi saliisarsimapput. Suliffissaaleqisut Timi Asimimut peqataasimasut aamma sapaatip-akunnerani matumani Tele suleqatigalugu suliassaqarput.
Qanoq neriuuteqarpisi?
- Assersuutigalugu inuusuttunit 90-init saaffigineqarutta taava kommunimukassaagut oqarlutalu, 'aajukua inuusuttut 90-it Timi Asimimut peqataarusuttut, oqarpusilu atorfissaqartinneqanngitsugut. Qanoq iliorniarpisigik.'
Apeqqutit qitiulluinnartut taakkua apeqqutigineqassapput.
Timi Asimi meeqqat angerlarsimaffiannik namminersortumik IMP-mik siorna suleqateqarpoq, suleqatigiilernissamullu periarfissaqarluaraluarluni, kisianni suleqatigiinnermut aatsaat erseqqilluinnartunik najoqqutassaqalerpat, Kim Godtfredsen paasissutissiivoq.
Timi Asimi periarfissinneqassaaq
Kommuneqarfik Sermersuumi meeqqanut, ilaqutariinnut atuarfeqarnermullu ingerlatsiviup pisortaa Søren Valbak paasissutissiilluni oqarpoq, kommunip Timi Asimi 'tapiiffigisimanngikkaa', kisiannili Timi Asimimi avataanit pilersuisutut kiffartuussissutinik ingerlatsinernillu pisisarsimasoq.
- Meeqqanut ilaqutariinnut tunngasuni suliniutinik tamarmiusunik nalilersuileruttorpugut, ilaatigut inuusuttunut atugarliortunut suliniuteqarnermik. Immikkoortortaqarfik siunissami suliniutinik pisariaqartunik nammineerluni pilersitsisalerneruniarpoq, kisiannili suliniutinut immikkut nassuiaasersukkanut suliassat ingerlanneqarnissaannut sullississunit avataaneersunit pisisarnissaq mattukkumanagu.
-Taama pisoqartillugu suliassanik suliariumannittussarsiuussineq pineqartassaaq, tamatumanilu Timi Asimi neqeroorusiornissamut aamma periarfissaqassaaq. Tamanna Timi Asimimut allaganngorlugu aamma nalunaarutigineqarsimavoq, Søren Valbak oqarpoq.
Aalajangiineq tamanna politikerinit aalajangiunneqarsimava?
- Allaffissornikkut aalajangiineruvoq, kisianni ataatsimiititaliaq (Meeqqanut, Ilaqutariinnut Atuarfeqarnermullu) kommunalbesturelsillu sinnera tamatuminnga ilisimatinneqarsimapput, ilaqutariinnermullu tunngasut ineriartortinneqarnissaannik allaaserisamut tunngavissat akuersissutigineqarsimallutik (Ineriartortitsinissamut pilersaarut).
Taanna ilisimatitsivoq inuusuttut siunnerfigineqartut, inuusuttut meeqqat atuarfiata kingorna suliffeqalerlutik ilinniagaqalerlutilluunniit imgerlariaqqinngitsoortartut, ukiut kingulliit ingerlaneranni 50 procentingajanniit 25 procentit missaannut appariarsimasut, kisiannili pissutsit suli naammaginanngitsut, eqqortumilli ingerlasoqartoq.
- Kikkut tamaasa meeqqat atuarfiata kingorna peqataatinniarlugit suliniutinik assigiinngiiaartunik arlalissuarnik suliaqartoqarpoq. Ilaatigut suliniutit Ineriartortinissamut Pilersaarummi qulaani taaneqartumi allaaserineqartut aqqutigalugit, Søren Valbak oqarpoq.
Allaaserineqartoq Nuuk Ugeavisimeersuuvoq. Aviisi akeqanngitsumik ataani aaneqarsinnaavoq: