assammik arsarneq
Timersortartut peqatigiiffiata VM-ernissaq neriuutigigaa
Naak kalaallit assammik arsartartut nunanut allanut unammisartui Amerikap nunavittaani pissartanngorniunnermi puljemut ajornartumut inissikkaluarut, unammisartut VM-imut anngunnissaat Elite Sport Greenlandip neriuutigaa
Kalaallit assammik arsarlutik nunanut allanut unammisartui maannakkorpiaq Argentinamut ingerlaarput, tassani Amerikap nunavittaani pissartanngorniunnermut peqataassapput, taannalu januaarimi Frankrigimi nunarsuarmi pissartanngorniunnermut anngunniunneruvoq.
Unammisartut taakku nukittuunut unammissapput, ilaatigut Argentina aamma Chile.
Unammisartut pingaarutillit
Elite Sport Greenlandimi siulittaasup Malik Hegelund Olsenip neriuutigaa, unammisartut iluatsitsissasut VM-imullu anngullutik.
- Kalaallit Nunaat puljemut ajornartumut inissinnikuuvoq, kisianni unammisartut pikkorissut soorlu Minik Dahl Høegh aamma Akutaaneq Kreutzmann, tamarmik danskit håndbold ligaanni unammisartut peqataatillugit, Kalaallit Nunaat aappaagu VM-imut anngunnissaanut neriuutissaqarpoq, taanna tusagassiuutinut nalunaarummi allappoq.
Atuaruk: Angutit nunanut allanut unammisartut Argentinaliartussat toqqarneqartut
Angusassamik toraagaqarneq aamma ajugaanissamik upperinninneq
Elite Sport Greenlandip nunanut allanut unammisartunut tamakkiisumik tapersersuipput, unamminerilu malinnaaffiginissaannut qilanaarlutik.
- Nalunngilarput sumininnguit assammik arsarluni unamminermi aalajangiisuusinnaasartut, kisianni aamma nalunngilarput angusassamik toraagaqarluni ajugaanissamillu upperinnilluni unammigaanni ajugaasoqartartoq, Malik Hegelund Olsen oqarpoq.
Nunanut allanut unammisartut kingullermik 2007-imi VM-imut peqataasut, arfininngorpat siullermeerlutik Argentinami unammissapput, tassani Canada unammissavaat. Nunatsinni nalunaaqutaq malillugu unammineq 18.00 aallartissaaq.