Inatsisartut

Timersortartut atugaasa pitsaanngorsaavigineqarnissaannut siunnersuut itigartitsissutigineqarpoq

Nivi Olsenip (D) kalaallit timersortartuisa nunanut allanut unammeqataanerminni atugaasa pitsanngorsaavigineqarnissaannik siunnersuutaa, amerlanerussuteqartunit taperserneqanngilaq. Sulinermilu annaasaqaatit ajornannginnerusumik qinnuteqaatigisinnaalernissaat, isumaqataaffigineqarpoq.

Kalaallit timersortartui Nunarput sinnerlugu OL-mi, VM-imi, EM-imi De Panamerikanske Mesterskabini imaluunniit World Cup-imi peqataanermi sulinermut annaasaqaatit qinnuteqaatigineqareersinnaanerit pissutigalugit, Nivi Olsenip (D) timersortartut atugaannik pitsanngorsaanngorsaaniarluni Inatsisartunut siunnersuutaa itigartitsissutigineqarpoq.

Aningaasammi 250.000 koruunit aningaasanut inatsimmi immikkoortinneqarsimapput, tassani timersortartut pikkorilluinnartut nunat tamalaat akornanni unammeqataanerminnut atatillugu sulinermi annaasaqaatigisimasatik qinnuteqaatigisinnaavaat.

Ukiullu siulia assersuutigissagaanni timersortartut pikkorilluinnartut 13-it aaqqiissuummi tassani taperneqarsimapput. Tassanilu aningaasat 130.650,00 koruunit atorneqarsimapput, tassa 250.000 koruuninit qinnuteqarfigineqarsinnaasunit ikinnerujussuullutik. Ukiunilu kingullerni pingasuni Kalaallit Nunaanni Timersoqatigiit Kattuffiata ukiumut agguaqatigiisillugu 117.000 koruunit aningaasarsianut annaasanut matussutissatut tapiissutigisarpai.

Atuaruk: 'Timersortartugut pitsaanerpaamik sinaakkusersiuutsigit'

Ilinniartitaanermut, Kultureqarnermut, Ilisimatusarnermut, Ilageeqarnermut Naalakkersuisoq, Doris J. Jensen (S) tassunga pilersaaruteqarpoq.

- Timersornermut tapiissutit, oqaaseqatigiivi allanngortinneqarpata, aaqqissuussinerit allat, ilaatigut sungiusarluni unamminerit, nunanut allanut unamminerillu allat ilanngunneqartuuppata aaqqissuussaq (Elite Sport Greenland aaqq.) aningaasanik tamakkiinerusumik atuinissaminut periarfissaqalissagaluartoq, taanna ataatsimiititaliamut akissuteqarluni allappoq.

Tassa timersortartut sungiusarlutik unammisimatillutik nunanullu allanut unammeqataasimatillutik annaasanik qinnuteqarsinnaalernissaat, ullumikkut qinnutigisinnaanngisaat, periarfissaalissaaq.

Powered by Labrador CMS