Inatsisartut
'Timersortartugut pitsaanerpaamik sinaakkusersiuutsigit'
Nunatsinni timersortartut nunanut allanut unammisartut atugaasa qanoq pitsanngorsaavigineqarsinnaanerat misissorneqarnissaat, Demokraatineersup Nivi Olsenip kissaatigaa. Taamaaliornikkut nunanut allanut unammisartut peqataanerini suliffimikkut ilinniakkamikkulli kingunerlutsisinnginnissaat anguneqassammat
- Timersortartugut pikkorissut nunatsinnut pitsaasumik ambassadøriusarput nuna tamakkerlugu unammisartut assigiinngitsut angalaqatigalugit nunarsuup sinnerani nunani allani timersortartunut unammingaangamik. Tamanna ullumimut naleqqiullugu pingaartinnerusariaqarparput.
Inatsisartuni ilaasortaq Nivi Olsen (D) Inatsisartunut siunnersuuteqarluni taama oqarpoq, siunnersuut ukiaanerani ataatsimiinnermi aalajangiiffigineqassaaq.
Atuaruk: Ukiaanerani politikkikkut ulapaartoqassaaq
Peqataaniarlutik pilliuteqangaatsiartartut
Taannami kissaateqarpoq, timersortartut nunanut allanut unammiartortut pitsaanerpaamik atugassaqartinneqartariaqartut.
- Ullumikkut timersortartut Kalaallit Nunaat sinnerlugu unammisartuunertik akisunarujussuartarpaat. Taamaasillutik timersortartut aalajangersimasumik atorfillit qaangiuttoornitik atorlugit freertariaqartarput feeriarlutilluunniit, Kalaallit Nunaat sinnerlugu unammiartoraangamik. Piffissaq atugaat uteqqinneq ajorpoq taamaattumik timersortartut ilaquttatik ikinngutitilluunniit peqatigalugit sulinngiffeqarnissaraluartik annaasarpaat, Nivi Olsen siunnersuummini allappoq.
Assersuutitut taavaa Team Danmark, Danmarkimi timersortartut pikkorinnersaannut tapiisartoq timersortartut sapinngisamik pitsaanerpaamik sungiusarsinnaaqqullugit OLeqarnissaanut imaluunniit VM-eqarnissaanut, taamaasilluni 2017-mi immikkut kattuffinnut tassannga 81,3 millioner koruunit tapiissutigineqarput.
Sinaakkutissat pitsaanerpaat
- Aamma taamaappoq ilinniartunut. Taakku ilikkagassaraluatik annaasarpaat ilinniagassatigullu kiisalu nalunaarusiornissamikkut kinguussaarataannaasarput. Ilinniarneq inuusuttunut pingaartorujussuuvoq aamma inuiaqatigiinnut. Taamaattumik pingaaruteqartorujussuuvoq nuna tamakkerlugu unammisartutut sassarnerup ilinniarnermut akorngutaannginnissaa, taanna erseqqissaavoq.
Taamaattumik Nivi Olsenip kissaatigaa, Naalakkersuisut misissuissasut paasiniarlugu nuna tamakkerlugu unammisartortatta atugaat qanoq pitsanngorsarneqarsinnaanersut.
- Demokraatini ilisimalluarparput nunaagatta ikittunnguanik inulik taamaattumillu naatsorsuutigisinnaanngikkipput nunat allat naligalugit unammisarsinnaanissarput, kisianni pisussaaffittut isigaarput timersortartut pikkorinnersaanik sapinngisamik pitsaanerpaamik sinaakkuteqartitsissalluta.
Siunnersuut Inatsisartut ataatsimiinneranni ulloq 10. oktober aalajangiiffigineqassaaq.