Timersortartoq KNI-it aningaasatigut tapersersorneqalerpoq
Iluliarmiu Frederik Petersen KNI A/S-imit aningaasatigut tapersersorneqalerpoq
Timersortartoq Frederik Petersen aamma KNI A/S aningaasaleeqataanissamut isumaqatigiissuteqarput.
Isumaqatigiissut tallimanngormat atsiorneqarpoq, KNI tusagassiutinut nalunaaruteqarpoq.
- Frederik Petersen sisoraatinik ujakkaartartuuvoq pikkorissoq Nunatsinni pissartanngorniunnerni Arctic Circle Race-milu peqataasarnermini angusarissaartartoq. Frederik Petersen aamma aqqusinikkut nunakkullu arpannermik ingerlataqartuuvoq, unamminernilu peqataasarluni angusarissaartarlunilu, soorlu Aasianni unnuakkut Marathon-imi, Oqaatsuniit Ilulissanut Cecilie løb aamma Ilulissat eqqaanni sumiissusersiorluni arpanneq ullunik pingasunik sivisussuseqartartoq Kangia Race peqataaffigisarlugit, KNI aallappoq.
Isumaqatigiissut ukiuni marlunni atuutissaaq. Isumaqatigiissut naapertorlugu Frederik Petersen sisoraatinik, timersornermi atisanik, akiliunneqarluni angalanernut aningaasanillu tunineqartassaaq.
- Isumaqatigiissut aamma imaqarpoq, peqataaffigisamini angusarissaaraangami aningaasaliiffigineqarnerusinnaassalluni, KNI ilisimatitsivoq.