Ilulissat
Timersortarfiliortisinissamut siulersuisut nutaanik aningaasaliisussarsiorput
Ilulissani timersortarfissualiornissap piviusunngortinneqarnissaanut suliniummi siulersuisut aningaasaliisussarsiorput. Taakku massakkut kommuni Namminersorlutillu Oqartussat qanimut suleqatiginialerpaat.
- Fifa-p akuerisaanik isikkamik arsaattarfik qulilik inuit aqqanillit unammiffigisinnaasaat sanaartortinneqarnissaa suli anguniagaraarput.
Ilulissani timersortarfissualiortitsinissamut siulersuisuni siulittaasoq, Niels Davidsen Sermitsiaq.AG-mut oqarpoq.
Taassuma paasissutissiaraa, suliniut pillugu siulersuisut Avannaata Kommunia ataatsimeeqatigineqarsimasoq.
- Tassani qanimut suleqatigiinnerunissarput isumaqatigiissutigaarput, taamaasiornikkut timersortarfissuaq piviusunngortissavarput. Qaammatip ingerlanerani kommunip Namminersorlutik Oqartussat ataatsimeeqatigisussaavaat, tassanilu suliniut ilaatigut eqqartorneqassaaq. Namminersorlutik Oqartussat suliniutip piviusunngortinneqarnissaanut aningaasaateqarfinnik ikiuussinnaanera neriuutigaarput, Niels Davidsen erseqqissaavoq.
Siulersuisut, kommunip toqqagaanik, ataatsimik ilaneqassasut, taassuma oqaatigaa.
- Suliniut piviusunngortinneqarnissaa Avannaata Kommunianit aamma ilungersuunneqarpoq, kommunilu 10 million koruuninik aningaasaliissuteqassalluni qularnaveeqqusiisimavoq. Lokale og Anlægsfonden 10 million koruuninik aningaasaleerusussimasup, uppernarsaataa amigaatigaarput, Niel Davidsen oqarpoq.
Timersortarfissuup sanaartorneqarnera 140 million koruuninik naleqassagatinneqarpoq. Tamannalu piviusunngussappat aningaasaateqarfimmik amerlanerusunilluunniit aningaasaleerusussanerat apeqqutaasorujuuvoq.
- Aningaasaateqarfinniit 60 million koruunit pissarsiarisinnaagutsigit inunnut qulingiluanut unammiffiusinnaasumik sanaartortitsiinnarsinnaavugut. Taamaammat suliniut piviusunngortinneqassappat aningaasaateqarfiit qanoq amerlatigisut aningaasaleerusunnerat apeqqutaavoq, Niels Davidsen oqarpoq.