Timersorluni ajoqusernerit ima pinngitsoorsinnaavatit

Sapaatip-akunneranut sungiusarnerit paarilluarpallaarsimanngilat. Immaqa aamma kiilumik ataatsimik marlunnilluunniit oqimaalliallassimavutit.

Kisianni unamminissamut piumassutsit suli ajunngilaq. Ingammik pissartanngorniunnissaq qanilleriarmat annertuneruleqqavoq.

Tamaammammallu tamaviaartoqassaaq, sungiusarnerillu annertusivat inuussutissarsiutigalugulu timersortartut qaangipajaarlugit sungiusarputit.

Tamannalu pivoq. Na'aa! Timit uninnissannut oqariartuuteqarpoq.

Sivisuumik ajoqusernerit
Sungiusarnerit annertusiartuaarusaarnissaa aamma nukinnut tunngatillugu ataqqinninnak sakkortuallaamik pisimavutit. Ajoquserputit timersorsinnaajunnaarlutillu. Ajoqusernerit ilaat sapaatip-akunnerini sivisussuseqartarput. Ilaat qaammatini. Ajornerpaatillugulu ukiuni imaluunniit timersorsinnaajunnaavinnermik kinguneqartarpoq.

- Ajoraluartumik timersortartut ukioq kaajallallugu sungiusarluarsimannginnertik peqqutigalugu timimikkut ajoqusertartut takujuartarpavut, taama oqarpoq Kalaallit Nunaanni Timersoqatigiit Kattuffiata pisortaa Carsten Olsen.

Inummut kingunipiloqarsinnaasut
Maanna Timersoqatigiit Kattuffiata ajoqusertoqartarnera iliuuseqarfiginialerpaa. Ukiuni tulliuttuni pikkorissaaneq ingerlasussaq Kalaallit Nunaanni Timersoqatigiit Kattuffiata ukiaru illoqarfinni assigiinngitsuni aallartissavaa. Sungiusaasut holdlederillu timersornermi ajoqusertarnermut tunngasunik pikkorissartinneqassapput.

- Kalaallit Nunaanni Timersoqatigiit Kattuffiata timersornikkut ajoqusertarnerit qanoq pinngitsoortinneqarsinnaanersut ukiorlu kaajallallugu sungiusarneq qanoq pingaaruteqartiginersoq paasisitsiniutigerusuppaat, Carsten Olsen tusagassiuutinut nalunaarummi erseqqissaavoq.

Sungiusanngippallaarnerup kinguneranik nukkiupiloorneq pissutigalugu nukiit ajoquserneqartarneri naggussatigullu ajoqusertarnerit ajoqutaanerpaasartut ilagaat, taakkulu annertuumik inummut kingunipiloqarsinnaasarput.

Ajoqusernertaqanngitsumik sungiusarneq
Sungiusaasut holdlederillu tamarmik pikkorissaanernut peqataasinnaassapput. Timersoqatigiit Kattuffiata timimik sungiusaasoq Kenneth Stage suleqatigalugu illoqarfinni assigiinngitsuni klubbit assigiinngitsut pikkorissaavigissavai, taakkulu ukiaru aappaagulu 2017-imi ingerlanneqassapput.

Sungiusaasut holdlederillu ajoqusernertaqanngitsumik sungiusaanermut, sungiusarnissamut pilersaarusiornernut aammalu timip pisataasa aalajangersimasut qanoq sungiusarneqartarnissaannut pikkorissarneqassapput.

Naggussatigut ajoqusernerit annertuut
Timersortartut sungiusartarnerminni pissusaat qanorlu akulikitsigisumik timimikkut annertarnerat timersoqatigiiffinni ataasiakkaani sungiusaasunit holdlederinillu aamma eqqumaffigineqarnerussaaq.

- Taama siunertaqarneq peqqissutsimut pingaaruteqaqaaq, tassami pikkorissaanerit aqqutigalugit timikkut anniaateqalersartut ikilisinneqassapput sivisunerusumillu timersuutiminnik aallussisut amerlanerulissallutik. Timersornermi ajoquserujussuarsimanertik pissutigalugu timersortartuujunnaarsimasunik nalunngisaqarpugut. Tamakku ajutoorujussuartarnerit ikinnerusimassagaluarput eqqortumik sungiusartarneq siornatigulli pikkorissaanerit taama ittut ingerlanneqartarsimagaluarpata, Carsten Olsen oqarpoq.