timersorneq
Timersoqatigiit Kattuffiat aningaasaliiffigineqangaatsiarpoq
Air Greenland Kalaallit Nunaanni Timersoqatigiit Kattuffiannut aningaasaliisutut pingaarnertut isumaqatigiissummik atsiorpoq timersortartuttalu ukiup tulliani nunani issittuni unammiuaarnissani South Slave-imi pisussani Canadami Yellowknife-imut uterlugulu angallassissalluni.
Aningaasaliinissamut isumaqatigiissut Timersoqatigiit Kattuffiat peqataasullu 175-it Airbus'imik Dash-8-millu Kangerlussuarmut kingornalu Yellowknife'imut uterlugulu attartornerannik akikillisaaneq minnerpaamik 1 million koruuninik naleqarpoq.
Air Greenland tusagassiuutinut nalunaarummi allappoq.
Ukiup tulliani Arctic Winter Games South Slave'mi ingerlanneqartussaavoq, tassani inuusuttut timersortartut 175-it South Slave'imi katersuutissapput timersuutinilu ilaatigut makkunanni unammissallutik: sulorarneq, futsal, nerrivimmi arsaararneq, issittumi timersuutit/arctic sport, dene games, volleyball, snowboard freestyle ujakkaarnerlu.
Timersoqatigiit Kattuffiani siulittaasup Air Greenland'imut anigaasaliisartutut isumaqatigiissutigineqarnera nuannarutigaa.
- Arctic Winter Games'imi Kalaallit Nunaata peqataanera nunatsinni sumiiffinni assigiinngitsuni klubbini pimoorussinermik annertuumik piumasaqaatitaqarpoq. Air Greenland'ip timersornermut immikkullu Arctic Winter Games 2018-mut aningaasaliissutaasigut meerartatta inuusuttattalu piginnaasalittaminnik naleqartitanillu peqqinnartunik inerisaanissaat
periarfissinneqarpoq, Nuka Kleemann tusagassiuutinut nalunaarummi oqarpoq.
Ukiup tulliani Arctic Winter Games 18. - 24. marts ingerlanneqassaaq.