tillinniarnerit
Tillinniat kiinappallit pillugit suli saaffiginnittoqarsimanngitsoq
Nuummi politiit sapaammi ualisoq Nuniaffimmi inissiami nakuuserluni tillinniartoqarneranut suliami suli saaffigineqarsimanngillat
Politiit Nuniaffimmi inissiami nakuuserluni tillinniarnermut atatillugu – tassani arnaq utoqqaq napparsimavimmut unitsinneqartariaqarsimasoq – takunnissimasunik ujartuineranni, innuttaasunit saaffiginnittoqarsimanngilaq.
Politiit pingaartuat Aqqalu Petersen Sermitsiaq.AG-mut paasissutissiivoq.
- Suliamut paasissutissanik tigusaqarsimanngilagut, Aqqaluk Petersen oqaluttuarpoq.
Aamma atuaruk: Politiit nakuuserluni tillinniartunik takunnissimasinnaasunik ujartuipput
Arfinngonerup unnuani pisoq
Arnamut nakuuserneq Nuussuarmi Niaffimmi inissiani sungaartuni arfininngornerup unnuaani ulloq 13. januar 2018 nalunaaquttap 02.00 missaani pivoq.
Arnap utoqqaap qanoq innera ilisimanagu sulilu napparsimavimmi uninngatinneqarnersoq, Sermersuup Nuummi politeeqarfiani pingaartup paasissutissiaraa.
- Arnap qanoq inneranut paasissutissat pappialanngorlugit aqagu nakorsamiit pissarsiarinissaat naatsorsuutigaarput, Aqqaluk Petersen oqarpoq.
Politiit saaffigikkit
Politiit paasiniaanerminnut atatillugu ilisimannittunik Nuniaffimmi blokkit sungaartut eqqaaniissimasunik takunnissimasinnaasunik, tallimanngornerullu arfininngornerullu akornanni unnuakkut nalunaaqutaq ataatsip pingasullu akornanni tusaasaqarsimasinnaasunik attavigineqarnissaminnut kissaateqarput.
Nuummi Politiit oqarasuaataasa normoraat 70 14 48.