Ilulissat
Tillinniap timersuutaarniarfimmut tillinniarsimanini nassuerutigaa
Ilulissani timersuutaarniarfimmut tillinniarsimasutut angut pasineqartoq Ilulissani politiit tigummigallagassanngortippaat
Sapaatip akunnerata siuliani timersuutaarniarfimmi Pilu Sportimi 200.000 koruunit naliginut tillinniartoqarsimaneranut Ilulissani politiit suliami paasisaqarput.
Innuttasut marluk angummik, atisanik imalimmik puussiaaserluni pisuttumik ippassaq pingasunngornermi unitsitsisimasut, politiit tusagassiuutinut nalunaarusiaminni paasissutissiipput.
- Innuttaasut marluullutik angut ornissimavaat, angutip tamanna aamma nassuerutigisimavaa. Inuit taakku marluk tillissimasutut pasisartik kinaassusersingamikku politiinut nassuiaasimapput angutip kinaaneranik qanorli isikkoqarneranik, politiit allapput.
Paasisitsiisoqarneratalu kingorna angut politiinit tingusarineqarpoq, angutip tillinniarsimanini nassuerutigaa.
Angut inatsit tunngaviusoq naapertorlugu killisiorneqarpoq, ullunilu 28-ini tigummigallagassanngortinneqarluni.
Atuaruk: Timersuutaarniarfimmi tillinniartoqarnerata kingorna politiit takunnittussarsiorput
Uppernarsaatissanik ujaasineq
Angut killisiorneqareermat politiit Ilulissani najugaqarfinnut assigiinngitsunut orniguttaqattaarsimapput. Tillinneqarsimasulli amerlanerit nassaarineqarsimapput massakkullu timersuutaarniarfimmut utertinniarneqarlutik.
Politiit innuttaasunut kaammattuipput tillitaasinnaasunik sillimaqqullugit tillinniarsimasormi allanik tillinniaqateqarsimasinnaammat.
- Tillitanik tuniniaasoqarsinnaanera politiit mianersoqqussutigaat, oqaatigalugulu tillitanik pisineq pineqaatissiissutigineqarsinnaasoq, Ilulissani politiit mianersoqqusipput.