Tillie: Tasiilami meeqqat Naalakkersuisut sumiginnarpaat

Tunumi meeqqanut ataatsimoortumik nutaaliortumillu suliniuteqarnissamut Suleqatigiissitsisut kajumissaaruteqarput

Tasiilami meeqqat pillugit iliuuseqarneq pillugu Tillie Martinussen (Sul) apeqquteqarpoq.

- Naalakkersuisut Tasiilami meeqqat inuusuttullu atugaat erloqinarluinnartut qaangerniarlugit suliniutit suut aallartinnikuuaat? taanna §37 naapertorlugu ilaatigut apeqquteqarpoq.

Isumaginninnermut naalakkersuisumit, Anthon Frederiksenip (PN) akissutaa naammaginngilluinnarpaa.

- Isumaginninnermut naalakkersuisumit akissut makitaniarlunilu isornartorsiugassaavoq, taanna Sermitsiaq.AG-mut oqarpoq.

Taassuma naammagisimaarinnginnera naalakkersuisup akisussaaffik kommunimut tutsinniarpallaarneranik isumaqarneranik pissuteqarpoq.

- Meeqqat kinguaasiutitigut atornerlunneqarsimasut katsorsarneqarnissaat pineqartillugit Isumaginninnermut Aqutsisoqarfiup Kommuneqarfik Sermersooq suleqatigisarpaa, Anthon Frederiksen ilaatigut taama akissuteqarpoq.

Sullissisullut suliaasa ikilisinneqarnerit pillugit ima nangilluni:

- Taanna kommunimit akisussaaffigineqarpoq Isumaqatiginninnermullu Aqutsisoqarfiup Kommuneqarfik Sermersooq ingerlaavartumik suleqatigisarpaa.

Anthon Frederiksenip akissutai tamaasa uani atuakkit.

Tillie Martinussenip isumaginninnermut tunngasut pingaarnertut kommunit akisussaaffigigaat ataqqiviaa. Kisianni ajornartorsiutinut ilungersunartunut Naalakkersuisut akuliutissallutik akisussaaffeqartut, taanna isumaqarpoq.

- Kommunip suleqatigineqarnera allanneratigut, piviusumik anguniakkamik toraagaqarluni pilersaaruteqartoqannginneranik takutitsivoq.

Illoqarfimmi inuiaqatigiit ilaatinneqassapput

Naalakkersuisut Kommuneqarfik Sermersooq peqatigalugu iliuuseqarnissamut pilersaarummik aalajangersimasumik – assinganik iliuuseqaannarani – ineriartortitsinissaannik ujartuivoq.

- Meeqqanut inuusuttunullu Tasiilami iliuuseqarnermut tunngatillugu nutaamik pisoqartariaqarpoq. Illoqarfimmi inuiaqatigiit iliuuseqartillugit, nutaamik eqqarsarluni, taamaanngippat pitsanngoriarnerit takunavianngilagut. Allannguinerit illoqarfimmi najugaqartut peqatigalugit pissaaq, ikiorsiinerlu pisariaqartinneqartoq qulakkiissavarput.

Tillie Martinussenip isumaginninnermut naalakkersuisup iliuuseqarnerunissaanik isumaqarnera ajornartorsiutit nuna tamakkerlugu takussaanerannik pissuteqarpoq.

Nunatsinnullu tulluartunik aaqqiissutissanik pisariaqartitsisoqarpoq.

- Meeqqat atugarliortut pillugit illoqarfimmi najugaqartut qanoq iliuuseqartissinnaanerinut misiliinissamut Tasiilaq periarfissatsialaavoq. Tassanngaanniik misilittakkat nunap sinnerani illoqarfinni minnerusuni nunaqarfinnilu atorsinnaavagut.

Pilersaarutinik ujartuisoq

Tamatuma saniatigut meeqqanut atugarliortunut pitsaanerusumik atugaqalersitsinissamut qanorpiaq iliuuseqartoqarnissaanik ersarinnerusumik allaatiginnittoqarnissaanik ujartuivoq.

- Nerisassanik pisariaqartitsisoqarpa? Atornerluinermut katsorsartinnissamut pisariaqartitsoqarpa? Ilaqutariit imaluunniit eqimattat katsorsartinnissaannik pisariaqartitsisoqarpa, imaluunniit angutit eqimattat iliuuseqartillugit?

- Isumaginninnikkut qanorpiaq iliuuseqartoqarnissaa qulaajassavarput, aamma qanoq akeqassanersoq paasiniarlugu.

- Aamma naak maannakkut piginnaasaqarfiginngikkaluarutsigit imaluunniit akissaqarfiginngikkaluarutsigit, suup tungaanut sulissanerluta paasisariaqarparput.

Tassanilu isumaginninnermut naalakkersuisup iliuuseqarnissaanik ujartuivoq.

- Tasiilami meeqqat anguniakkamik toraagalimmik maannakkorpiaq iliuuseqartoqarnissaanik pisariaqartitsisut sumiginnarpai.

Powered by Labrador CMS