Tillie Martinussen: Hans, tassa
Siulersuisuuffiit nunaqavissuinnarnik inuttalersorneqartalernissaannik Hans Enoksenip oqariartuutaa, Suleqatigiissitsisut sakkortuumik isornartorsiorpaat.
Suliffeqarfinni Namminersorlutik Oqartussanit pigineqartuni siulersuisut tamarmik nunaqavissunit inuttalersortarnissannik Hans Enoksenip oqariartuuteqarnera, Tillie Martinussenimit Suleqatigiissitsisuneersumit sukkasuumik sakkortuumillu qisuariarfigineqarpoq.
- Maanna siulersuisuni sulinermi piginnaasat inuiaassutsikkullu tunuliaqutaq pillugu oqallinnitoqarsuaq uterfigeqqissavarput?, taanna tusagassiuutinut nalunaarummi allappoq.
- Ullumikkut siulersuisut suliaminnut piginnaasallit siulersuisuni sukumiisumik sanarfineqarsimasuni ilaasortaapput. Siulersuisuni ilaasortat piginnaasatik tunngavigalugit toqqarneqarsimapput.
- Taamaakkaluartoq qineqqusaarutaarpaluppoq, maanna tusagassiutitigut sioorasaarisoqarmat.
- Hans, tassa.
Hans Enoksenip nunaqavissut kalaallisut imaluunniit danskisut ukiorpassuarni Nunatsinni najugaqarsimasutut nassuiarpai. Taassuma siunnersuutaa piviusunngortinneqassappat, maanna siulersuisuniittut 30-t taarserneqassapput.
- Piginnaasat tamaasa tikilluaqqusariaqarpagut, nunaqavissut, nuunnerit aamma nunanit allaneersut. Tamaasa atorfissaqartittorujussuuagut, Tillie Martinussen isumaqarpoq.
- Oqaaseqaatit taama ittut kikkut tamaasa eqqortarpaat; ilinniarsimasortagut, maanga nuuttortagut, siulersuisuni ilaasortagut kalaallisut oqalussinnaanngitsut.
- Siulersuisuni ilaasortagut kalaallisut oqalussinnaasut - kalaallisut oqalussinnaanertik kisiat pillugu tassani issianerarneralugit pasillerneqartut.
- Tamarmik assoroorlutik sulisut ingerlatseqatigiiffinni pitsaasumik aqutsillutik ingerlatsisut, Hans Enoksenimit taassumalu oqaaseqaataanit tatisimaneqartutut misigisariaqarput.