Tillie kialaamut pisoq
Sapaatip-akunneri arfinillit matuma siorna Suleqatigiissitsisut pilersinneqarsimanngilaq. Tillie Martinussenip partii pilersinneqaqqammersoq sinnerlugu maanna Inatsisartuni ilaasortaassaaq.
Suleqatigiissitsisuni siulittaasup, Michael Rosingip, Naalagaaffeqatigiinnerup ineriartortinnissaanik ilungersuussaqartup talini aqqarsinnaarpianngilai.
- Qinersinermi angusaq nuannaarutigisorujussuuara. Sapaatip-akunnerini arfinilinni Inatsisartuni ilaasortaatitaqalernissarput iluatsipparput. Soqarata aallartippugut. Inuttaqarata. Aningaasaateqarata. Partiimi anguniakkanik peqarata. Maanna maanga killippugut. Tulluusimaartorujussuullungalu nuannaaqaanga, Michael Rosing oqarpoq, taanna partiip qinigassanngortitaani arfineq-pingasuusut akornanni taaguunneqarnerpaanngilaq. Tillie Martinussen taaguunneqarnerpaavoq, Inatsisartunilu ilaasortanngorluni.
Naalakkersuisoqatigiinnut ilaanianngitsut
- Tillie Suleqatigiissitsisut sinnerlugit sassarnera nuannaarutigisorujussuuara. Pikkorissorujussuuvoq, Michael Rosing oqarpoq, taassuma Suleqatigiissitsisut naalakkersuisoqatigiinnut ilaatinniarsarinianngilai.
- Naagga, illuatungiliuttuniikkusunneruvugut, isumarpullu nangaassuteqarata ersarissumik nipeqarluta oqaatigisarusunneruarput, partiimi siulittaasoq oqarpoq, taassuma Demokraatit siuariarujussuarnerat tupaallaatiginerpaavaa, taamatullu partiit annerit marluk, IA aamma Siumut, kinguariarnerat tupigusuutiginngilaa.
- Nutaat amerlanerusut aamma partiit minnerusut ilanngukkaangata taamaattussaavoq.
Tillie Martinussen aamma Michael Rosing assigalugu qinersinerup inernera nuannaarutigeqaa.
- Piffissami taama sivikitsigisumi angusaq tamanna angusinnaagatsigut qujamasoqaanga.