Tiliumit suliniut: Innarluuteqaruit pisinnaatitaaffitit ilisimakkit
Innarluutillit allaffeqarfiat Tilioq siullermeersumik isumasioqatigiissitsissaaq ataatsimeersuartitsillunilu. Tassani Naalaaffiit Peqatigiit Inuit Innarluutillit pillugit isumaqatigiissutai sammineqassapput, tamatumalu inuiaqatigiinni qanoq inunnut innarluutilinnut pitsanngorsaataasinnaaneri eqqartorneqassallutik.
Isumasioqatigiinnermi ataatsimeersuarnermilu sineriak tamakkerlugu inuit innarluutillit pisinnaatitaaffii sammineqassapput.
Atuagaq paasiuminarsagaq
Tamatumunnga atatillugu Tiliup sulissutigisassaasa ilagissavaat inuit innarluutillit pisinnaatitaaffiinut isumaqatigiissutip kalaallisut qallunaatullu paasiuminarsarlugu suliarinissaa. Atuagaaraq taanna ”paasiuminarsagaq” Kalaallit Nunaanni aatsaavissuaq pigineqalissaaq, atuagaarannguarlu inuiaqatigiinnut paasititsiniutitut atugassatut suliarineqareeruni aalajangersakkatut atuutilissalluni.
Eqqarsaataavoq atuagaarannguaq peqatigiiffinnik inunnillu innarluutilinnut sullissisunut atugassaajumaarpoq, taamaalilluni inuinnarnut aammalumi suliffimmut atatillugu isumaqatigiissutip pisinnaatitaaffiit taakkartugai paasilluarneqarneruniassammata.
- Pingaaruteqarsimavoq suliniummi uani peqatigiiffiit ilaatinneqarnissaat, taakkuami Kalaallit Nunaat tamakkerlugu sorlaqarmata. Aalajaatsunik attaveqarfeqartarput, sumiiffimminnilu immikkut illuinnartunik ilisimasaqarlutik ilaasortaqarlutillu. Neriuutigaarput isumasioqatigiinneq, atuakkallu Inuit Innarluutillit pillugit isumaqatigiissutip paasiuminarsakkap peqatigiiffinni ilaasortanut sumiiffinilu assigiinngitsuni qaammarsaaniutitut atorluarneqartarumaartoq, taamaalilluni inuit amerlanerusut pisinnaatitaaffitik aallaavigalugit piumasaqartarniassammata, pisinnaatitaaffitillu eqqortinneqartut, Inuit Innarluutillit illersuisuat Christina Johnsen isumasioqatigiinnerup siunertaa pillugu oqaluttuarpoq.
Kajumissutsimik suliaqartut
Ataatsimeersuarnermi Nunatsinni innarluutillit pillugit attuumassuteqartut tamaasa katersortinneqassapput Kalaallit Nunaannilu Inuit innarluutillit pisinnaatitaaffii pillugit isumaqatigiissutip eqqortinniarneqarnera killiffilersussavarput. Tamatuma saniatigut ataatsimeersuarnermi aamma ikioqatigiilluta siumut isigaluta qanoq iliorluta Inuit innarluutillit pisinnaatitaaffii pillugit isumaqatigiissutip atornerasigut inuit innarluutillit atugaat pisinnaatitaaffiilu pitsanngorsarsinnaanerlugit sammissavarput.
Ulluni marlunni isumasioqasigiisitsineq nuna tamakkerlugu ataatsimeersuarnermik naggaserneqassaaq. Ataatsimeersuarnermut Namminersorlutik oqartussat, kommuneqarfiit, pisortat ataanni susassaqarfiit, innarluutillinnut tunngassuteqartunut soqutigisallit aggersarneqarput. Ataatsimeersuarnermi Kalaallit Nunaanni inuit innarluutillit pisinnaatitaaffii pillugit isumaqatigiissutip atuutsinneqarnera killiffissiorneqassaaq.